Read Pashto (Nangahari) — د پښتو مقدس کتاب ايُوب 16 Bible Online

ايُوب 16 - Pashto (Nangahari) — د پښتو مقدس کتاب bible

ايُوب 16

¹بيا ايُوب جواب ورکړو:

²”زۀ د دې څيزُونو نه پخوا خبر يم، او ستاسو خبرې ما له تسلى نۀ راکوى.

³ستاسو د هوائى خبرو څۀ حد نشته څۀ؟ يا په څۀ وجه باندې تاسو خبرې نۀ بندوئ؟

⁴که تاسو زما په ځائ وئ نو هم ما ستاسو خِلاف لوئې لوئې خبرې جوړولے شوې، او ستاسو سپکاوے به مې کړے وے.

⁵خو که دا زۀ وے، نو ما به ستاسو حوصله افزائى کړے وے. او ما به دا کوشش کړے وے چې ستاسو غم لرې کړم.

⁶خو که زۀ د خپل ځان صفائى پېش کوم نو زۀ به په تکليف کښې کېږم، خو که زۀ خبرې نۀ کوم نو ما ته بيا هم ډېر تکليف رارسېږى.

⁷اے خدايه پاکه! زۀ اوس تا ډير ستومانه کړے يم، تا زما ټوله کورنۍ تباه کړې ده.

⁸تا زۀ ګېر کړے يم، او دا زما خِلاف يو ثبوت دے، چې زۀ اوچ کلک او کمزورے شوے يم، او دا زما خِلاف ګواهى ورکوى.

⁹هغۀ د خپلې غصې په وجه زۀ خراب کړے يم او زما نه نفرت کوى، هغۀ ما ته خپل غاښُونه چيچلى دى، زما دشمنى د هغۀ سترګې زما خِلاف برندوى.

¹⁰سړى په ما پورې خندا کوى، هغوئ په مسخرو کښې ما په مخ باندې وهى او زما خِلاف يې اتفاق کړے دے.

¹¹خُدائ پاک ما د خُدائ نه منکرو خلقو له ورکوى، او د بدعمله خلقو لاسونو ته مې حواله کوى.

¹²زۀ صحيح سلامت وم او هغۀ زۀ دوه ټوټې کړم، هغۀ زۀ د څټ نه ونيولم او ټوټې ټوټې يې کړم، هغۀ زۀ د خپلې نښې په توګه ودرولم.

¹³د هغۀ غشى ويشتُونکى زما نه تاو شول. هغۀ زما ګردې راوويستلې او په ما يې هيڅ رحم ونۀ کړو، هغۀ زما تريخے په زمکه بهر وغورزولو.

¹⁴هغۀ زۀ بيا مات رامات کړم، هغۀ د يو جنګيالى په شان په ما باندې رامنډه کړه.

¹⁵ما د ځان دپاره د ټاټ جامې ګنډلې دى، او هغۀ زۀ د خاورې په شان مېده کړے يم.

¹⁶زماسترګې د ژړا نه سرې دى، او زما د سترګو ليمۀ تور شول.

¹⁷اګر چې ما هيڅ ظلم زياتے نۀ دے کړے، او زما په دعا کښې خلوص دے.

¹⁸اے زمکې، زما وينه مۀ پټوه، او زما د اِنصاف فرياد دې څوک نۀ ختموى.

¹⁹خو بيا هم په آسمان کښې داسې ذات شته چې هغه زما مل دے او هغه به بې شکه ووائى چې زۀ په حقه يم.

²⁰زما مينځګړے زما دوست دے او زما سترګې خُدائ پاک ته اُوښکې تويوى.

²¹او زما دوست زما دپاره خُدائ پاک سره بحث کوى لکه څنګه چې يو سړے د خپل دوست دپاره منت زارى کوى.

²²صِرف يو څو کاله به پاتې وى چى زۀ به په هغه سفر باندې روان شم چې د هغې نه واپس کېدل نشته.