Read Pashto (Nangahari) — د پښتو مقدس کتاب ايُوب 18 Bible Online

ايُوب 18 - Pashto (Nangahari) — د پښتو مقدس کتاب bible

ايُوب 18

¹بيا شوحى بِلداد جواب ورکړو:

²”تر کومې پورې به تۀ خبرې کوې؟ د مطلب خبره کوه، نو بيا به مونږ خبرې وکړُو.

³مونږ په ځناورو کښې ولې شمېرلے شو؟ مونږ ستاسو په نظر کښې ولې کم عقلان يُو؟

⁴تۀ په غصه کښې هسې خپل ځان سوزوې، ستا دپاره دې دنيا پرېښودلے شى څۀ، يا غرونه دې ستا دپاره د خپل ځائ نه لرې کړے شى څۀ؟

⁵په حقيقت کښې د بدعمله خلقو ډيوه ختمه کړے شوې ده، او بيا به د هغې شغلى بلې نۀ شى.

⁶د هغوئ په خېمه کښې رڼا په تيارۀ بدله شوې ده، او د هغوئ دپاسه ډيوه مړه کړے شوې ده.

⁷د هغوئ مضبوط قدمونه خطا شوى دى، او د هغوئ خپلو منصُوبو هغوئ ناکام کړى دى.

⁸ځکه چې هغوئ په يو جال کښې نښتى دى، او هغوئ په يوه کنده کښې پرېوزى.

⁹د هغوئ پونده په دام کښې ګېرېږى، او هغه يې کلک ونيسى.

¹⁰يو جال په زمکه کښې پټ دے، او د هغوئ په لاره کښې يو دام پټ دے.

¹¹هغوئ د هر طرف نه يريږى، او چې چرته هم ځى نو يره ورپسې وى.

¹²د هغوئ طاقت د لوږې په وجه ختم شوے دے، او تباهى د هغوئ د غلطۍ په انتظار کښې ده.

¹³بيمارۍ د هغوئ څرمن خورى، او مرګ د هغوئ اندامونه خورى.

¹⁴چې په کومو خېموکښې هغوئ په حِفاظت کښې وُو نو هغه ويستلے شوى دى، او هغوئ د دهشت بادشاه ته راوستلے شوى دى.

¹⁵د هغوئ په خېمو کښې هيڅ څوک هم پاتې نۀ دى، او د هغوئ د کورونو دپاسه د ګوګړو باران دے.

¹⁶د هغوئ جرړې لاندې اوچې شوى دى، او د هغوئ څانګې پاس مړاوې شوى دى.

¹⁷د هغوئ نوم به د زمکې نه ختم شى، او په لارو کُوڅو کښې به د هغوئ ذکر نۀ کېږى.

¹⁸هغوئ د رڼا نه تيارې ته ديکه کړے شوى دى، او د دنيا نه شړلے شوى دى.

¹⁹د هغوئ اولاد نشته، او د هغوئ د کورنۍ يو کس هم ژوندې پاتې شوے نۀ دے.

²⁰د نَمرخاتۀ طرف نه واخله تر نمرپرېواتۀ پورې چې څوک هم د هغوئ د انجام نه خبرېږى، نو د يرې نه لړزېږى.

²¹دوئ به وائى چې دا د بدعمله خلقو کور دے، د هغه چا څوک چې د خُدائ نه منکر وى.“