Read Pashto (Nangahari) — د پښتو مقدس کتاب ايُوب 19 Bible Online

ايُوب 19 - Pashto (Nangahari) — د پښتو مقدس کتاب bible

ايُوب 19

¹بيا ايُوب جواب ورکړو:

²”تۀ به تر کومې پورې ما له تکليف راکوې، او په خپلو خبرو به زما زړۀ غوڅوې؟

³تا لس ځلې زما بې‌عزتى کړې ده، تۀ چې ما له کوم تکليف راکوې په هغې باندې تۀ شرمېږې نه څۀ؟

⁴او که دا رښتيا هم وى چې ما غلطى کړې ده، نو ستا پکښې څۀ کار دے؟

⁵تۀ په خپل نظر کښې زما نه لوئ يې، زما تکليف د ګناه د ثبوت دپاره استعمالوې.

⁶نو بيا پوهه شه چې خُدائ پاک زۀ په غلطه کړے يم، او زما نه ګېرچاپېره يې جال خورکړے دے.

⁷ګوره، زۀ د فرياد چغې هم وهم، خو څوک ما له جواب نۀ شى راکولے، زۀ په زوره زوره چغې وهم، خو اِنصاف نشته.

⁸خُدائ زما لارې بندې کړې دى او زۀ خوزيدے نۀ شم، او هغۀ زما په لار کښې تيارې جوړې کړې دى.

⁹هغۀ زما نه عزت اخستے دے، او زما د سر نه يې تاج اخوا کړے دے.

¹⁰هغه د هر طرف نه ما راغورزوى او زۀ ختم يم، هغۀ د ونې په شان زما د اُميد جرړې راويستلې دى.

¹¹هغه زما خِلاف سخت غصه شوے دے، او هغه مې خپل دشمن ګڼى.

¹²د هغۀ فوجيان راغونډ شوى دى، هغوئ په ما باندې حملې دپاره لارې تيارې کړى دى. او زما د خېمې نه ګېرچاپېره يې خېمې لګولې دى.

¹³زما خپلوان ما نه ځان لرې ساتى، او زما دوستان زما خلاف شوې دى.

¹⁴زما خپلوانو او زما نزدې دوستانو زۀ پرېښے او هېر کړے يم،

¹⁵زما په کور کښې مېلمنو زۀ هېر کړے يم، زما وينځې ما پردے سړے ګڼى، زۀ د هغوئ په نظر کښې يو مسافر يم.

¹⁶زۀ چې خپل نوکر راوغواړم نو هغه ما له نۀ راځى، زۀ هغۀ ته سوال زارى کوم.

¹⁷زما د خولې بوئ هم زما په ښځه باندې بد لږى، زما خپله کورنۍ زما نه نفرت کوى.

¹⁸واړۀ ماشومان هم ما ته سپک ګورى، کله چې زۀ هغوى سره خبرې کول غواړم نو هغوى ماته شا کړى.

¹⁹زما نزدې ملګرى زما نه نفرت کوى، او چې د چا سره ما مينه کوله نو هغوئ زما نه مخ اړولے دے.

²⁰په ما کښې صرف هډوکى او څرمن پاتى وه او ډير په مشکله د مرګ نه تښتيدلے وم.

²¹اے زما دوستانو، په ما باندې رحم وکړئ، په ما باندې رحم وکړئ، ځکه چې د خُدائ پاک ګذار زۀ وهلے يم!

²²تاسو د خُدائ پاک په شان ولې په ما پسې يئ، تاسو زۀ ښۀ نۀ يم کړولے څۀ؟

²³کاش چې زما خبرې ليکلے شوے وے، کاش چې زما خبرې په يو کِتاب کښې بيان شوے وے.

²⁴کاش چې د اوسپنې او د پيتلو د قلم سره دا خبرې په يو ګټ باندې د همېشه دپاره نقش شوے وے!

²⁵زما يقين دےچې زما خلاصوُونکے ژوندې دے، او چې په آخِر کښې به هغه د زمکې دپاسه ودرېږى،

²⁶او چې کله زما څرمن بالکل ختمه شى، نو بيا به زۀ په خپلو سترګو خُدائ پاک ووينم،

²⁷زۀ به هغه په خپله وګورم، او زۀ به هغه په خپلو سترګو ووينم. زما سره صرف هم دغه فکر دے!

²⁸ستا حق نۀ جوړېږى چې ما له تکليف راکوې، او وايې چې دا ستا خپله غلطى ده.

²⁹د سزا نه پخپله ويريږه ځکه چې ستا رويه د سزا لائقه ده، او بيا به تا ته پته ولګى چې حساب کِتاب شته.“