Read Pashto (Nangahari) — د پښتو مقدس کتاب ايُوب 22 Bible Online

ايُوب 22 - Pashto (Nangahari) — د پښتو مقدس کتاب bible

ايُوب 22

¹بيا تيمانى اليفز جواب ورکړو:

²”بنى آدم خُدائ پاک له څۀ فائده ورکولے شى؟ د ټولو نه هوښيار کس هم د هغۀ مدد کولے شى څۀ؟

³د خُدائ تعالىٰ دپاره به څۀ خوشحالى وى که تۀ صادق شې، که ته خپل عملونه صفا کړې نو هغۀ له به څۀ فائده ورکړى؟

⁴چې تۀ پرهېزګار يې نو ځکه هغه په تا اِلزام لګوى او ولې ستا خِلاف د عدالت نه کار اخلى څۀ؟

⁵نه، هغه وجه ده چې ستا بدعملى زياته ده او ستا د ګناهونو ختمېدل نشته.

⁶لکه چې تا د خپلو وړُونو نه د قرض پېسې په زور اخستې دى، او تا د هغوئ نه جامې ويستلې دى او بربنډ دې پرېښى دى.

⁷تا تږو کسانو له اوبۀ نۀ دى ورکړې، او تا د نهَرو کسانو نه روټۍ ايساره کړې ده.

⁸تا د خپل طاقت او حيثيت نه کار واخستلو او په ټول مُلک دې قبضه وکړه.

⁹تا کُنډې تش لاس لېږلې دى، او يتيمان دې نااُميده کړى دى.

¹⁰نو په دې وجه ستا نه ګېرچاپېره دامونه دى، او يوه ناڅاپه يره به په تا باندې غالبه شى،

¹¹يا يوه داسې تيارۀ چې تۀ به يې ليدلے نۀ شې، د اوبو يو سېلاب به تا پټ کړى.

¹²پاس په آسمانونو کښې خُدائ پاک نشته څۀ؟ پاس ستورى وګوره چې څومره اُوچت دى!

¹³نو دا ځکه تۀ وايې چې تۀ څۀ کوې نو خُدائ پاک ته پته نۀ لږى، هغه په توره وريځ کښې پټ دے نو هغه څنګه عدالت کولے شى؟

¹⁴تکه توره وريځ د هغۀ نه تاو شى نو هغه کتل نۀ شى کولے، او هغه په عرش باندې مزل کوى.

¹⁵تۀ به په هغه زړو لارو ځې څۀ، چې په کومو باندې بدعمله کسان تلل؟

¹⁶د هغوئ دوران راتلو نه مخکښې سيلاب هغوى لاهو کړل.

¹⁷هغوئ خُدائ پاک ته وئيلى وُو چې زمونږ نه قلار شه، او داسې يقين يې لرلو چې خُدائ د هغوئ هيڅ هم نۀ شى کولے.

¹⁸خو بيا هم هغه خُدائ پاک وو چې دوئ يې مالداره کړل، زۀ د بدعمله خلقو په خيالونو هيڅ غرض نۀ لرم.

¹⁹صادِقان د بدعمله تباهى ګورى او خوشحاليږى، خو بې ګناه کسان په دوئ پورې خندا کوى.

²⁰وائى چې زمونږ دشمنان څنګه تباه شوى دى، او چې د هغوئ څوک پاتې وُو هغه اور تباه کړى دى.

²¹خُدائ پاک ته خپل ځان حواله کړئ، او د هغۀ سره روغه وکړئ، او ستاسو هر کار به سم وى.

²²د هغۀ په تعليماتو عمل کوئ، او د هغۀ خبرې زړۀ ته کُوزې کړئ.

²³که تاسو خُدائ تعالىٰ ته راواپس شئ، نو تاسو به په خپل ځائ باندې بيا ولګئ، که تاسو د خپل ژوند نه بدى وباسئ،

²⁴که تاسوسرۀ زر خاورې وګڼئ، او د اوفير سوچه سرۀ زر د سيند د کاڼو په شان وګڼئ،

²⁵نو بيا خُدائ تعالىٰ په خپله ستاسو دسرو زرو په شان دے او هغه ستاسو قيمتى سپين زر دے.

²⁶نو بيا به تاسو د خُدائ تعالىٰ سره خوشحاله اوسئ، او د زړۀ نه به هغۀ سره ملاقات کولے شئ.

²⁷نو تاسو به هغۀ ته سوال وکړئ او هغه به ستاسو سوال قبول کړى، او تاسو به خپل قسمونه پوره کړئ.

²⁸تاسو به په هر کار کښې کامياب يئ، او ستاسو لار به روښانه وى.

²⁹کله چې خُدائ پاک خلق کمزورى کړى نو تۀ وائې دا ځکه چې هغوئ مغروره وو، خو په اصل کښې خُدائ پاک خلق په دې طريقې سره بچ کوى.

³⁰ځکه چې خُدائ پاک بې ګناه خلق بچ کوى، کۀ چرې تۀ بې ګناه يې نو هغه به تا هم بچ کړى.“