Read Pashto (Nangahari) — د پښتو مقدس کتاب ايُوب 23 Bible Online

ايُوب 23 - Pashto (Nangahari) — د پښتو مقدس کتاب bible

ايُوب 23

¹بيا ايُوب جواب ورکړو:

²”زما شکايت په دې وخت کښې هم سخت دے، زۀ سلګئ وهم او خُدائ پاک بيا هم ما له سزا راکوى.

³کاش چې ما هغه موندلے شوے، نو زۀ به د هغۀ دربار ته تلے وم.

⁴زۀ به خپله مسئله هغۀ ته وړاندې کړم، او د هغۀ په حضُور کښې به ټول عرضونه پېش کړم.

⁵چې هغه ما له څۀ جواب راکوى نو زۀ به ورته غوږ ونيسم، او چې څۀ راته وائى په هغې باندې به ځان پوهه کړم.

⁶د دومره لوئ طاقت سره به هغه زما مخالفت کوى څۀ؟ خو نه داسې نۀ ده، هغه به زما خبره په توجو سره واورى.

⁷يو نېک سړے د هغۀ سره د خبرو کولو حق لرى، او زما قاضى خُدائ پاک به مې د همېشه دپاره بې ګناه وګرځوى.

⁸ګوره چې زۀ مخکښې ورشم نو هلته هم نۀ وى او که شاته لاړ شم نو هلته هم نۀ وى،

⁹نۀ يې په ښى طرف موندے شم او نۀ په يې په ګس طرف موندلے شم.

¹⁰خو هغۀ ته د هغې لارې پته ده چې کومه ما اِختيار کړې ده، او کله چې هغه ما وآزمائى نو زۀ به د سرو زرو په شان صفا يم.

¹¹زۀ د هغۀ په نقشِ قدم روان وم، او زۀ هيڅ کله د هغۀ د لارې نه نۀ يم اوړېدلے.

¹²زۀ همېشه د هغۀ په حُکمونو عمل کوم، ما د هغۀ کلام د خپل ضرورى خوراک نه هم زيات قيمتى ګڼلے دے.

¹³خو هغه بدلېدونکے نۀ دے، نو د هغۀ فېصله څوک بدلولے شى؟ چې د هغۀ څۀ رضا وى نو هم هغه کوى.

¹⁴هغه چې زما دپاره کومه منصُوبه لرى نو هغه به پوره کوى، او هغه زما دپاره ډيرې منصُوبې لرى.

¹⁵نو په دې وجه زۀ د هغۀ په حضُور کښې يرېږم، کله چې زۀ په دې سوچ کوم نو په يره کښې راګېر شم.

¹⁶خُدائ پاک زۀ بې زړۀ کړے يم، او خُدائ تعالىٰ زۀ يرولے يم،

¹⁷خو زۀ په تيارۀ کښې راګېر يم، او تکه توره تيارۀ زما نه راتاو ده.