Read Pashto (Nangahari) — د پښتو مقدس کتاب ايُوب 27 Bible Online

ايُوب 27 - Pashto (Nangahari) — د پښتو مقدس کتاب bible

ايُوب 27

¹ايُوب خپله خبره جارى وساتله:

²”زۀ په ژوندى خُدائ پاک قسم خورم، چا چې زما حقُونه اخستې دى، او هغه خُدائ تعالىٰ چا چې زما ژوند تريخ کړے دے،

³چې تر څو پورې زۀ ژوندې يم او چې د خُدائ پاک روح په ما کښې وى،

⁴نو زما ژبه به غلطې خبرې ونۀ کړى، او زما ژبه به دروغ ونۀ وائى.

⁵زۀ به هيڅ کله دا ونۀ وايم چې تۀ په حقه يې، تر څو پورې چې مړ شوے نۀ يم نو صداقت به زما سره وى.

⁶زۀ به دا دعوه هيڅ کله پرې نۀ ږدم چې زۀ بې ګناه يم، ځکه چې ټول عُمر زما ضمير صفا دے.

⁷څوک چې زما مخالفت کوى يا زما سره جګړې کوى نو هغوئ ته دې د ګناهګارو او بدعملو په شان سزا مِلاو شى.

⁸ځکه چې د خُدائ نه د منکرو خلقو اُميد به څۀ وى چې کله هغوى د ژوند نه لاس ووينځى، کله چې خُدائ پاک د هغوئ نه ژوند واخلى؟

⁹چې کله مصيبت په هغوئ باندې راشى نو خُدائ پاک به د هغوئ ژړا اورى څۀ؟

¹⁰هغوئ به د خُدائ تعالىٰ سره خوشحاله شى څۀ؟ هغوئ به هر وخت خُدائ پاک ته آواز کولے شى څۀ؟

¹¹زۀ به تا ته د خُدائ پاک د طاقت په باره کښې ښودنه وکړم، څۀ چې د خُدائ تعالىٰ سره وى نو زۀ به هغه نۀ پټوم.

¹²تاسو دا هر څۀ په خپله ليدلى دى، خو بيا هم تاسو ما ته دا فضول خبرې کوئ؟“

¹³”دا د خُدائ پاک سره د بدعمله کسانو برخه ده، او دا هغه ميراث دے چې ظالِمانو ته د خُدائ تعالىٰ د طرف نه ملاوېږى،

¹⁴که د هغوئ اولاد ډېر هم وى، خو د هغوئ بچى به په جنګ کښې او د لوږې نه مړۀ شى.

¹⁵څوک چې پاتې وى نو هغوئ به په وبا باندې مړۀ شى، او د هغوئ کُنډې به هم په هغوئ باندې ژړا ونۀ کړى.

¹⁶هغوئ سره سپين زر د خاورو نه زيات دى، او بې حسابه جامې ورسره دى،

¹⁷هغوئ به دا رايوځائ کړى، خو نېکان به دا واغوندى، او بې ګناه کسان به سپين زر په خپلو کښې تقسيم کړى.

¹⁸بدعمله کسان خپل کورونه د جالو په شان داسې کمزورى جوړوى، لکه چې څوکيداران څپر جوړوى.

¹⁹هغوئ به د دولت سره څملى، خو چې سترګې وغړوى، نومال به يې ختم وى.

²⁰يره د سېلاب په شان په هغوئ باندې غالبه شى، او د شپې طوفان يې يوسى.

²¹د نَمرخاتۀ طرف هوا هغوئ اُوچت کړى او هغوئ ختم شى، او دا هوا يې په مخه يوسى.

²²دا په بې رحمۍ سره په هغوئ باندې راوغورزېږى، اکر چې هغوئ د تښتېدو پوره کوشش کوى.

²³هوا په هغوئ پسې داسې شور جوړوى لکه چې سړے په چا پورې خندا کوى.“