Read Pashto (Nangahari) — د پښتو مقدس کتاب ايُوب 35 Bible Online

ايُوب 35 - Pashto (Nangahari) — د پښتو مقدس کتاب bible

ايُوب 35

¹اليهُو خپله خبره جارى وساتله او وې وئيل:

²”ستا په خيال دا دعوىٰ به صحيح وى، چې تۀ وائى چې د خُدائ پاک په نظر کښې زۀ صادق يم.

³خو تۀ بيا هم د هغۀ نه تپوس کوې چې په دې کښې زما څۀ ګټه ده، او د ګناه د نۀ کولو په وجه ما ته څۀ فائده مِلاو شوې ده؟

⁴زۀ به تا او ستا ملګرو له جواب درکړم.

⁵آسمان ته نظر وکړه او وګوره، هغه وريځې وګوره، کومې چې ستا نه اُوچتې دى.

⁶که تا ګناه کړې وى، نو په خُدائ پاک باندې څۀ اثر پرېوزى؟ او که تۀ بار بار غلطيانې کوې، نو تۀ به د هغۀ څۀ وکړې؟

⁷که تۀ صادق يې، نو دې نه هغۀ ته څۀ فائده ده؟ خُدائ پاک ته ستا د يو څيز ضرورت هم نشته.

⁸ستا بدعملى صرف ستا په شان بنى آدم باندې اثر کوى، او ستا ښۀ عمل هم په نورو بنيادمو باندې اثر کوى.

⁹د ظلمونو د زياتېدو په وجه خلق فرياد کوى، او د زورَورو د ظلم په وجه د مدد دپاره چغې وهى.

¹⁰خو هيڅ څوک دا نۀ وائى چې خُدائ پاک زما پېدا کوُونکے چرته دے؟ څوک چې د غم په وخت هم په خوله باندې سرودونه راولى،

¹¹هغه مونږ ته د دنيا د ځناورو نه زياته ښودنه کوى، او مونږ د هوا د مارغانو نه زيات هوښياروى؟

¹²چې کله بدعمله فرياد کوى، نو د هغوئ د غرور په وجه جواب نۀ ورکوى.

¹³په حقيقت کښې خُدائ پاک بې مقصده فرياد نۀ اورى، او نۀ خُدائ تعالىٰ دې ته څۀ توجو ورکوى.

¹⁴تاسو وايئ چې تاسو خُدائ پاک نۀ وينئ، خو که تاسو لږ صبر وکړئ نو هغه به د اِنصاف نه کار واخلى!

¹⁵تاسو وايئ چې خُدائ پاک په غصه کښې سزا نۀ ورکوى، او د بدعملۍ پروا نۀ ساتى.

¹⁶ايُوبه، تۀ فضول خبرې کوې، او لکه د يو بې وقوف په شان خبرې کوې.“