Read Pashto (Nangahari) — د پښتو مقدس کتاب ايُوب 38 Bible Online

ايُوب 38 - Pashto (Nangahari) — د پښتو مقدس کتاب bible

ايُوب 38

¹نو مالِک خُدائ د طوفان نه ايُوب له جواب ورکړو:

²”هغه څوک دے چې بغېر د څۀ پوهې نه زما د عقل په باره کښې تپوسونه کوى؟

³نو اوس ټينګ شه، او زما د سوال جواب راکړه.

⁴کله چې ما د زمکې بُنياد کېښودو نو تۀ چرته وې؟ که تا ته دومره پته وى نو ما ته ووايه.

⁵چا معلوم کړى دى چې دا به څومره غټ وى؟ او چا په دې باندې د ناپ کرښه راښکلې ده؟

⁶د دې بنيادونه په څۀ باندې ودرېدل، او د دې د ګوټ کاڼے چا کېښودو؟

⁷چې کله د سحر ستورو په يو ځائ سندرې وئيلې او ټولو فرښتو د خوشحالۍ نه چغې وهلې.

⁸کله چې سمندر زمکې ته راخلاص شو، نو دا چا قابو کړو؟

⁹کله چې ما وريځ د دې لِباس جوړ کړو، او دا ما په تکه توره تيارۀ کښې راونغښتلو،

¹⁰او د دې دپاره مې حدونه جوړ کړل، او را ايسار مې کړو چې د حد نه وانۀ وړى،

¹¹او ورته مې ووئيل چې د دې نه وړاندې به نۀ راځې، او ستا زورورې چپې دې دلته ايسارې شى.

¹²تا کله حُکم کړے دے چې سحر دې شى، او نمر ته دې وئيلى دى چې د نَمرخاتۀ طرف نه راوخېژى؟

¹³تا سحر له حُکم ورکړے دے چې په زمکه خور شى، او چې د شپې بدعملى ختمه کړى؟

¹⁴او بيا زمکه د رڼا د وجې صفا ښکارى، او رنګ يې د رنګدارو جامو په شان شى.

¹⁵رڼا د بدعمله خلقو کارونه بندوى، او هغوئ نور ظلم زياتے نۀ شى کولے.

¹⁶تا هغه چينې ليدلې دى چې سمندر ترې نه جوړېږى، يا تا د دې ډُوبوالے معلوم کړے دے؟

¹⁷د مرګ دروازه تا ته ښکاره شوې ده څۀ؟ يا تا د تکې تورې تيارې دروازې ليدلې دى څۀ؟

¹⁸تۀ د دنيا په لوئ والى پوهه شوے يې څۀ؟ که د دې نه خبر يې نو ما ته ووايه.

¹⁹رڼا د کوم ځائ نه راځى، او د تيارې ځائ چرته دے،

²⁰تۀ دا هر يو خپل خپل کور ته بوتلے شې څۀ؟ تا ته پته شته چې هغې ته کومه لار تلى ده؟

²¹خو تۀ خو به د دې هر څۀ نه خبر يې کنه؟ ځکه چې د دې پېدا کېدو نه وړاندې تۀ موجود وې، او تۀ د ډېرې مودې يې.

²²تۀ د واورې ګودامونو ته ننوتلے يې څۀ، يا تا د ږلۍ ګودامونه ليدلى دى څۀ؟

²³هغه چې ما د مصيبت د وخت دپاره ساتلى دى، او د جنګ جګړې دپاره مې ساتلى دى؟

²⁴هغه ځائ ته تلے يې څۀ چرته چې نمر راخېژى، او د کوم ځائ نه چې د نَمرخاتۀ هوا لږى؟

²⁵د دروند باران لارې چا جوړې کړې دى، او د تندر د برېښنا دپاره يې لار صفا کړې ده،

²⁶په هغه مُلک باندې څوک باران راولى چرته چې هيڅ څوک نۀ اوسېږى، په هغه صحرا باندې، چې هغه د بنيادمو نه خالى وى،

²⁷چې هغه تږې او اوچه زمکه اوبۀ کړى، او چې په هغه زمکه باندې واښۀ راشنۀ کړى؟

²⁸ولې د باران پلار شته څۀ، يا پرخه چا پېدا کړې ده؟

²⁹د واورې مور څوک ده؟ او د اسمان يخ له ژوند څوک ورکوى؟

³⁰کومه چې اوبۀ د کاڼى په شان سختې کړى، او د سمندر مخ کلک کړى.

³¹تۀ عقدِ ثُريا ستورو ته لار ښودلے شې، يا جبار ستورے په مينځ بيلولے شې څۀ؟

³²ولې تۀ منطقتُ البُروج ستورو ته خپل موسمونه ښودلے شې، يا تۀ بناتُ النعش ستورى ته سره د هغې د بچو لار ښودلے شې؟

³³تۀ د آسمان په قانون پوهېږې څۀ؟ يا تۀ د هغوئ قانون په زمکه باندې قائمولے شې څۀ؟

³⁴ولې تۀ خپل آواز وريځو ته رسولے شې څۀ، د دې دپاره چې باران ووروى؟

³⁵تۀ برېښنا ځلولے شې څۀ؟ يا دا پخپله مرضئ باندې راغورزولے شې څۀ؟

³⁶خبره په زړۀ کښې چا اچولې ده، او دماغو له پوهه چا ورکړې ده؟

³⁷داسې هوښيار شته چې وريځې وشمېرى؟ يا د آسمان نه باران ورولے شى داسې لکه چې د منګى نه اوبۀ توئ کړے شى،

³⁸په هغه اوچه زمکه باندې چې د خاورې نه يې لوټې جوړى شوى وى؟

³⁹ولې تۀ د ازمرى دپاره ښکار کولے شې، او د وړو زمرو لوږه پوره کولے شې،

⁴⁰کله چې هغه په خپلو غارونو کښې پټ وى، يا په بوټو کښې د ښکار په اِنتظار ناست وى؟

⁴¹کارغانو دپاره د خوراک بندوبست څوک کوى، کله چې د هغوئ بچى خُدائ پاک ته ژړا کوى، او د خوراک د نشتوالى په وجه سرګردانه ګرځى؟