Read Pashto (Nangahari) — د پښتو مقدس کتاب ايُوب 7 Bible Online

ايُوب 7 - Pashto (Nangahari) — د پښتو مقدس کتاب bible

ايُوب 7

¹بنى آدم په دنيا کښې سخت محنت نۀ کوى څۀ، او د هغوئ ژوند د مزدور په شان نۀ دے څۀ؟

²لکه چې غلامان د سورى په آرمان وى، او لکه مزدوران د خپلې تنخواه په طمع وى.

³په مياشتو مياشتو زما څۀ مقصد نشته، او د غم شپې ما له راکړے شوى دى.

⁴کله چې زۀ څملم نو وايم چې، زۀ به کله پاڅېږم؟ خو شپه اُوږده وى، او تر سحر پورې په کټ کښې اوړم را اوړم.

⁵زما بدن د دانو او چينجو نه ډک دے، زما څرمن سخا شى او بيا وشلېږى.

⁶زما عُمر د سيلۍ په شان تېز روان دے، او په نااُميدۍ کښې ختمېږى.

⁷ياد ساته چې زما ژوندصرف يوه ساه ده، او زما سترګې به بيا هيڅ کله ښۀ ورځ ونۀ ګورى.

⁸تۀ ما اوس وينې خو بيا به مې ونۀ ګورې، تۀ به ما لټوې، خو زۀ به نۀ يم.

⁹لکه څنګه چې وريځ کمه شى او فنا شى، نو چې څوک لاندې قبر ته لاړ شى نو هغه ترې نه بيا هيڅ کله نۀ شى راختلے،

¹⁰هغوئ بيا واپس خپلو کورونو ته نۀ شى راتلے، او هغوئ به هيڅ کله نۀ ښکارى.

¹¹نو په دې وجه زۀ به خپله خولهٔ نۀ بندوم، زۀ به د خپل زړۀ د درد اظهار کوم، زما زړۀ د غصې نه تاو کړے دے.

¹²زۀ سمندرى بلا يم څۀ؟ چې ما د نظر لاندې ساتى؟

¹³زۀ د دې دپاره څملم چې آرام وکړم، د دې دپاره چې د درد نه خلاص شم.

¹⁴نو تۀ بيا ما په خوبونو کښې يروې او په تصور کښې مې يروې،

¹⁵نو زما دپاره د ساه بنديدل ښۀ دى، د داسې کړاو نه په مرګ خوشحال يم.

¹⁶زۀ د خپل ژوند نه نفرت کوم، زۀ به همېشه ژوندې نۀ يم. په دې لنډ تنګ ژوند کښې ما پرېږده.

¹⁷بنى آدم څۀ څيز دے، چې تۀ يې دومره خاص ګڼې، چې تۀ هغوئ ته دومره توجو ورکوې،

¹⁸هر سحر يې معائنه کوې، او هر وخت هغوئ معلوموې؟

¹⁹تۀ به ماله د يوې لحظې موقع رانۀ کړې چې ساه پکښې واخلم؟

²⁰اے د بنيادمو ليدونکيه! که زۀ ګناه کوم، نو په تا باندې څۀ اثر کوى؟ تا زۀ ولې په نښه کړے يم؟ زۀ په تا باندې بوج جوړ شوے يم څۀ؟

²¹تۀ زما غلطيانې ولې نۀ معاف کوې او زما ګناه ولې نۀ لرې کوې؟ زۀ به ډېر زر په لحد کښې پروت يم، تۀ به ما لټوې، خو زۀ به مړ يم.“