Read Pashto (Nangahari) — د پښتو مقدس کتاب ايُوب 8 Bible Online

ايُوب 8 - Pashto (Nangahari) — د پښتو مقدس کتاب bible

ايُوب 8

¹بيا بِلداد شوحى ووئيل:

²”تر څو پورې به تۀ دا خبرې کوې، او دا بک بک به جارى ساتى؟

³خُدائ پاک د اِنصاف نه نۀ اوړى. او د خُدائ تعالىٰ کارونه همېشه په حقه وى.

⁴که ستاسو بچو د هغۀ خِلاف ګناه کړې وى، نو هغوئ ته به د هغې بدله مِلاو شوې وى.

⁵که تۀ خُدائ پاک ولټوې او خُدائ تعالىٰ ته په دعا کښې سوال وکړې،

⁶که تۀ صفا او صادق يې، نو هغه به په خپله راپاڅى او هغه به تا له خپل صحيح مقام واپس درکړى.

⁷اګر چې ستا شروع معمولى شان وه، خو په مستقبل کښې به مالدار شې.

⁸معلوماتو دپاره مخکښينو نسلونو نه تپوس وکړه، او د هغوى چې کومې تجربى دى په هغې غور وکړه.

⁹ځکه چې مونږ پرون پېدا شوى يُو او مونږ ته هيڅ پته نۀ لږى، ځکه چې په زمکه باندې زمونږ وخت د سورى په شان روان دے.

¹⁰خو پريږده چې هوښيار مشران درته ښودنه وکړى، او د هغوئ وېنا ته غوږ نيسه.

¹¹چرته چې اوبۀ نۀ وى نو هلته لوښه نۀ راکېږى، دا د اوبو نه بغېر نۀ کېږى.

¹²او دا لا شنه وى او رېبلے شوى نۀ وى، خو د نورو واښو نه زر وچيږى.

¹³نو چې څوک خُدائ پاک هېروى نو د هغوئ هم دغه لار ده، چې څوک د خُدائ نه منکر وى نو د هغوئ اُميد به ختم شى.

¹⁴د هغوئ ايمان نازک وى، د هغوئ يقين د جولا د جالې په شان وى.

¹⁵چې څوک په دې جاله يقين کوى نو هغوئ ته به دا جاله ټينګه نۀ شى، که څوک ورپورې ځان وتړى، نو دا به يې برداشت نۀ کړى.

¹⁶منکر کسان داسې ښکارى چې په نمر کښې رازرغون وى، او د دې څانګې په باغ کښې خورې ورې وى.

¹⁷د هغوئ جرړې د کاڼو د ډېرى نه تاوېږى، او دا کاڼى کلک نيسى.

¹⁸خو که هغوئ د خپل ځائ نه لرې کړے شى، نو بيا به هغوئ اِنکار وکړى چې مونږ تۀ نۀ يې ليدلے.

¹⁹ګوره، د هغوئ خوشحالى به د لږ وخت دپاره وى، خو نور بوټى راشنۀ شى او د دې ځائ ونيسى.

²⁰ګوره، خُدائ پاک به يو بې داغه کس نۀ رد کوى، او نۀ به د بدعمله خلقو مدد وکړى.

²¹هغه به تاسو له خوشحالى درکړى، او ستاسو خولې به د خندا نۀ ډکې کړى.

²²چې څوک ستا نه نفرت کوى نو تۀ به يې په شرم وشرموې، او د بد کارانو کور به تباه شى.“