Read Pashto (Nangahari) — د پښتو مقدس کتاب زبور 101 Bible Online

زبور 101 - Pashto (Nangahari) — د پښتو مقدس کتاب bible

زبور 101

¹زهٔ به ستا د مينې او اِنصاف سرود ووایم، او زهٔ به تا ته مالِک خُدایه د ثناء سرود ووایم.

²زۀ به احتياط کوم چې بې داغه ژوند تېر کړم، خو تۀ به زما د مدد دپاره کله راځې؟ او زهٔ به په خپل کور کښې په صفا زړهٔ ژوند تیروم.

³کوم څیزونه چې فاسد وی زهٔ به ورته نهٔ ګورم. د بې ایمانانو د کارونو نه به نفرت کوم، او زهٔ به د هغوئ سره کار نهٔ ساتم.

⁴او د چا چې وی زړونه کاږۀ ما نه به لرې وی، او زۀ به د بدئ سره هيڅ کار نهٔ ساتم.

⁵څوک چې پټ کوی د خپلو ګاونډیانو غیبتونه، زهٔ به هغه چُپ کوم. د چا چې سترګې کبرژنې او مغروره وی، هغه سړے به زهٔ نۀ برداشت کوم.

⁶زما سترګې به په دنيا کښې د ایماندارو په لټون شی، چې هغوئ زما سره اوسيږی. د چا کردار چې بې داغه وی نو هغوئ به زما خدمت کوی.

⁷زما په کور کښې به دوکه مار ته د اوسیدو اجازت نهٔ وی، او دروغجن به زما په حضُور کښې ودرېدلے نهٔ شی.

⁸هر سحر به زۀ هغه بدکاره چې په ملک کښې مې اوسيږی تباه کوم، زۀ به هر بدعمله د مالِک خُدائ د ښار نه ورک کړم.