Read Pashto (Nangahari) — د پښتو مقدس کتاب زبور 105 Bible Online

زبور 105 - Pashto (Nangahari) — د پښتو مقدس کتاب bible

زبور 105

¹د مالِک خُدائ شکر ګذاری وکړئ، او د هغهٔ نوم واخلئ، کوم کارونه چې هغهٔ کړی دی قومونه ترې خبر کړئ.

²هغۀ ته سرود ووايئ او د هغهٔ ثناء صِفت وکړئ، او د هغۀ ټول عجيبه کارونه وستايئ.

³تاسو د هغۀ په مقدس نوم فخر وکړئ، او د چا زړونه چې د مالِک خُدائ لټُون کوى هغوئ دې خوشحالی وکړی.

⁴د مالِک خُدائ او د هغهٔ د طاقت لټون وکړئ، هر وخت د هغهٔ د مخ د ليدو کوشش کوئ.

⁵کوم عجيبه کارونه چې هغهٔ کړی دی هغه راپه ياد کړئ، او د هغهٔ معجزې او اِنصاف یاد ساتئ.

⁶اے د هغۀ د خِدمتګار اِبراهيم بچو، د هغۀ د غوره شوى د يعقوب بچو.

⁷هغه زمونږ رب او خُدائ پاک دے، د هغهٔ عدالت په ټوله دنيا کښې دے.

⁸هغه خپل تړون تر ابده پورې ياد ساتى، او هغه تر زر نسله پورې خپله وعده ياده ساتى،

⁹کوم تړون چې هغهٔ د ابراهیم سره کړے وو، او هغه قسم چې دهٔ د اسحاق سره کړے وو.

¹⁰هغهٔ دا د یعقوب دپاره اصُول جوړ کړو، او دا يې د بنی اِسرائيلو دپاره ابدی تړون کړو.

¹¹هغهٔ وفرمائيل، ”تاسو ته به زهٔ د کنعان ملک درکړم، لکه د خپل حق په شان به يې په میراث کښې درکړم.“

¹²په کوم وخت کښې چې په شمار کښې دوئ ډیر کم وُو، او په حقیقت کښې هغوئ لږ او مسافر وُو.

¹³دوئ به د یو قوم نه بل قوم ته سرګردانه ګرځیدل، او د یو بادشاهت نه به بل بادشاهت ته سرګردانه تلل.

¹⁴څوک يې هم نهٔ پريښودل چې په دوئ ظُلم وکړی، تر دې چې د دوئ دپاره به يې بادشاهان رټل.

¹⁵هغه فرمائی، ”زما غوره شوو خلقو ته څهٔ ونهٔ وايئ، او نۀ زما پېغمبرانو ته نقصان ورسوئ.“

¹⁶هغهٔ په هغه زمکه باندې قحط نازل کړو، او د دوئ د خوراک وسیلې يې تباه کړې.

¹⁷هغهٔ د دوئ نه وړاندې یو سړے مصر ته ولېږلو، يوسف څوک چې د یو غلام په شان خرڅ شولو.

¹⁸د هغهٔ خپې يې په بيړو خوږ کړې، د اوسپنو زنځير يې په غاړه ورته واچولو.

¹⁹ترڅو چې د هغهٔ پیشګويې پوره شوې نهٔ وه، د مالِک خُدائ کلام د هغهٔ د زړهٔ د رښتینوالی آزمېښت وکړو.

²⁰نو بیا بادشاه هغه راوغوښتو او آزاد يې کړو، د قومونو بادشاه هغه آزاد کړو.

²¹هغهٔ هغه د خپل کور مشر جوړ کړو، په خپل ټول ملکیت يې اختیار ورکړو.

²²يوسف د بادشاه په آفسرانو باندې اختیار لرلو او د هغهٔ مشیرانو ته يې تعليم ورکولو.

²³نو بيا بنی اِسرائيل مِصر ته راننوتل، د حام په ملک کښې یعقوب د مسافر په شان اوسیدلو.

²⁴خو مالِک خُدائ خپل خلق ډیر کړل، هغهٔ دوئ د دشمنانو نه ډیر زیات کړل.

²⁵هغهٔ د خپل قوم نه تور کړل د مِصريانو زړونه، چې د دهٔ د خدمتګارانو سره چالاکی وکړی.

²⁶هغهٔ خپل خدمتګار موسىٰ ورولیږلو، او ورسره يې کوم چې هغهٔ غوره کړے وو هارون ورولېږلو.

²⁷نو هغوئ د خلقو په مخکښې د هغهٔ عجيبه نښې ښکاره کړې، او عجيبه معجزې او نښې یې د حام په ملک کښې ښکاره کړې.

²⁸هغهٔ تيارۀ راولېږله او ملک يې ټول تورتم کړلو، خو ولې دوئ د هغهٔ د کلام مخالفت وکړلو.

²⁹او هغهٔ د دوئ اوبۀ په وینو باندې بدلې کړې، او د دوئ کبان يې په کښې مړهٔ کړل.

³⁰د دوئ ټول ملک د چیندخانو نه ډک شو، او تر دې چې د بادشاهانو په کمرو کښې ښکاره شول چيندخان.

³¹د هغهٔ په حُکم راغلل د مچانو لښکرونه، او ورسره راغلل د ماشو لښکرونه.

³²د باران په ځائ ږلۍ ورباندې راغله، او ورسره په ټول ملک کښې د بریښنا او تندر آوازونه.

³³هغهٔ باغونه د انګورو اينځرانو ورله تباه کړل، او د هغوئ د ټول ملک ونې يې راوغورځولې.

³⁴هغهٔ حُکم وکړُو او د قحط د ملخانو راغلل لښکرونه، او ورسره وُو هم د نورو بې شماره ملخانو لښکرونه.

³⁵دوئ ورنه د ملک ټول شنۀ بوټی وخوړل، او د دوئ د خاورې ټول پیداوار يې وخوړلو.

³⁶نو بیا هغۀ په ټول ملک کښې د هغوئ مشران زامن هلاک کړل، او د هغوئ د نارینتوب ړومبئ میوه تباه کړه.

³⁷هغۀ بنی اِسرائيل په سرو او سپينو زرو بار کړی راوويستل، او د هغوئ د قبيلو ټول خلق روغ رمټ پاتې شول.

³⁸په مصر کښې ډیره خوشحالی وشوه د هغوئ په تلو، ځکه چې په هغوئ باندې دباو غورزیدلے وو د اِسرائيلو.

³⁹د هغوئ د پټولو دپاره يې وریځ راخوره کړله، او اور يې راولیږلو چې شپه يې ورله رڼا کړله.

⁴⁰هغوئ ورته سوال وکړو او هغهٔ دوئ ته مړزان ورکړل، او هغوئ يې په آسمانى ډوډۍ ماړهٔ کړل.

⁴¹هغهٔ ګټ په مينځ نیم کړو او اوبۀ ترې نه روانې شولې، لکه د سیند په شان په صحرا کښې وبهیدلې.

⁴²ځکه چې هغۀ ته خپله پاکه وعده ياده وه، کومه وعده چې هغهٔ خپل خدمتګار ابراهیم سره کړې وه.

⁴³هغهٔ خپل خلق په ډیرې خوشحالئ سره راوویستل، خپل غوره شوی خلق یې د خوشحالئ په چغو او سورو سره راوویستل.

⁴⁴هغۀ هغوئ له د نورو قومونو زمکه ورکړله، هغوئ ته هغهٔ په میراث کښې د نورو ګټه مفته ورکړله.

⁴⁵چې دوئ د هغهٔ اصُول وساتی او د هغهٔ قانون وپیژنی، ثناء دې مالِک خُدائ ته وی.