Read Pashto (Nangahari) — د پښتو مقدس کتاب زبور 111 Bible Online

زبور 111 - Pashto (Nangahari) — د پښتو مقدس کتاب bible

زبور 111

¹د خُدائ ثناء ووايئ. زهٔ به په خپل ټول زړهٔ سره د مالِک خُدائ لوئې بيان کړم، کله چې زهٔ د هغهٔ د نیکو خلقو سره په جماعت کښې مِلاو شم.

²د مالِک خُدائ کارونه ډیر لوئ دی، څوک چې په دې فکر کوی نو په هغه کښې خوشحاله دی.

³د هغهٔ کارونه د جلال او لويئ نه ډک دى، او د هغهٔ صداقت د تل دپاره ‎پاتې وی.

⁴د هغهٔ معجزې به خلق تل یادې ساتی، زمونږ مالِک خُدائ بخښونکے او مهربان دے.

⁵د هغهٔ نه چې څوک یریږی هغوئ ته رزق ورکوی، هغه خپل تړون د تل دپاره یاد ساتی.

⁶هغهٔ خپلو خلقو ته د خپلو کارونو زور ښودلے دے، او هغوئ ته يې د نورو قومونو زمکې ورکړی دی.

⁷د هغهٔ د لاس ټول کارونه په اِنصاف او ښهٔ دی، او د هغهٔ ټول اصُولونه اعتباری دی.

⁸او هغه تر ابده قائم پاتې کیدونکی دی، او دا ټول په وفادارۍ او صداقت سره شوی دی.

⁹هغۀ د خپلو خلقو دپاره کفاره ورکړه، هغهٔ خپل تړون تر ابده پورې قائم کړو، د هغهٔ نوم مقدس دے او شان او شوکت لری.

¹⁰د مالِک خُدائ نه یره کول د حکمت شروع ده، هر هغه څوک چې د هغۀ قانون منى هغه هوښيار دے، د تل دپاره به د هغهٔ ثناء صفت وی.