Read Pashto (Nangahari) — د پښتو مقدس کتاب زبور 116 Bible Online

زبور 116 - Pashto (Nangahari) — د پښتو مقدس کتاب bible

زبور 116

¹د مالِک خُدائ سره مینه کوم ځکه چې هغۀ زما سوال زاری اوریدلې ده، هغهٔ زما سوال زاری د رحم دپاره اوريدلې ده.

²ځکه چې هغه اوس په ما خيال ساتی او خپل غوږ يې ما ته رااړولے دے، تر څو چې زۀ ژوندې يم زۀ به هغهٔ نه سوال کوم.

³د مرګ پړو راګیر کړے یم، د قبر سخته په ما راغلې ده، زۀ په خپل خفګان او تکلیفونو کښې ډوب شوم.

⁴نو ما بیا د مالِک خُدائ په نوم چغه کړه، چې، ”اے مالِکه خُدايه ما بچ کړه.“

⁵مالِک خُدای مهربانه او صادِق دے، زمونږ خُدائ پاک پوره رحیم دے.

⁶مالِک خُدائ ساده زړۀ لرونکی خلق بچ کوی، کله چې زهٔ ډیر سخت حاجتمند ومه هغهٔ زهٔ بچ کړم.

⁷نو زما روحه یو ځل بیا خپل آرام ته راشه، ځکه چې مالِک خُدائ ما سره ښۀ دے.

⁸خو تا په خپله اے مالِکه خُدایه زما روح د مرګ نه بچ کړو، زما سترګې دې د اوښکو نه اوچې کړې، زما خپې دې د تيندک خوړلو نه بچ کړې.

⁹نو بیا به زهٔ د مالِک خُدائ په وړاندې، د ژوندو په ملک کښې وګرځم.

¹⁰نو زما دا ايمان وو نو ځکه ما ووئيل چې، ”زۀ ډېر په تکليف کښې يم.“

¹¹او ما په خپله مایوسئ کښې دا ووئیل چې، ”ټول اِنسانان دروغجن دى.“

¹²نو زهٔ به څنګه مالِک خُدائ ته د هغې بدل خلاص کړم، د هغهٔ د ټولو هغه ښیګړو چې ما سره يې کړی دی.

¹³زۀ به د خلاصُون جام اُوچت کړم، او زهٔ به د مالِک خُدائ په نوم سوال زاری وکړم.

¹⁴زۀ به د مالِک خُدائ سره خپلې ټولې وعدې پوره کړم، د هغهٔ د ټولو خلقو په وړاندې به خپلې وعدې پوره کړم.

¹⁵د مالِک خُدای په نظر کښې د هغهٔ د مقدسینو مرګ ډیر اهم دے.

¹⁶اے مالِکه خُدايه په رښتيا سره ستا خِدمتګار يم، لکه ستا د وینځې د زوئ په شان زهٔ ستا خدمتګار یم، تا زۀ د زنځيرونو نه آزاد کړے يمه.

¹⁷زهٔ به تا ته د شکر ګذارئ قربانی وکړم، او د مالِک خُدائ په نوم به دعا وغواړم.

¹⁸زۀ به د مالِک خُدائ سره خپلې ټولې وعدې پوره کړم، د هغهٔ د ټولو خلقو په وړاندې به خپلې وعدې پوره کړم.

¹⁹د مالِک خُدائ د کور په دربار کښې يروشلیمه ستا په مينځ کښې مالِک خُدائ ته دې ثناء صِفت وی.