Read Pashto (Nangahari) — د پښتو مقدس کتاب زبور 118 Bible Online

زبور 118 - Pashto (Nangahari) — د پښتو مقدس کتاب bible

زبور 118

¹د مالِک خُدائ شکر وباسئ ځکه چې هغه ښهٔ دے، د هغهٔ مینه د تل دپاره پاتې کیږی.

²بنى اِسرائيل دې داسې ووائى، ”د هغهٔ مینه د تل دپاره پاتې کیږی.“

³د هارون کورنۍ دې داسې ووائى، ”د هغهٔ مینه د تل دپاره پاتې کیږی.“

⁴هغوئ څوک چې د مالِک خُدائ نه يرېږى، دې ووائى، ”د هغهٔ مینه د تل دپاره پاتې کیږی.“

⁵ما په سخته کښې مالِک خُدائ ته سوال زاری وکړه، هغهٔ زما سوال قبول کړو او زۀ يې آزاد کړم.

⁶مالِک خُدائ زما مل دے زۀ به نۀ يرېږم، اِنسان زما څۀ کولے شی.

⁷مالِک خُدائ زما مل دے او هغه زما مددګار دے، زۀ به د خپلو دشمنانو په شکست خوشحالی وکړم.

⁸دا ښۀ ده چې په مالِک خُدائ کښې پناه واخلم، د دې په ځائ چې په بنیادم توکل وکړم.

⁹دا بهتره ده چې په مالِک خُدائ کښې پناه واخلم، نه چې په شهزادګانو توکل وکړم.

¹⁰زۀ ټولو قومونو راګېر کړم، خو د مالِک خُدائ په نوم مې هغوئ مات کړل.

¹¹زهٔ هغوئ د هر طرف نه راګیر کړم، خو د مالِک خُدائ په نوم مې هغوئ مات کړل.

¹²هغوئ زما نه لکه د مچو په شان راتاو شو، لکه د ازغو د اور په شان زر هلاک شو، خو د مالِک خُدائ په نوم مې هغوئ مات کړل.

¹³هغوئ ما ته سخته ديکه راکړه چې راپریوځم، خو مالِک خُدائ زما مدد وکړو،

¹⁴مالِک خُدائ زما سندره او طاقت دے، هغه زما خلاصوونکے جوړ شوے دے.

¹⁵د خوشحالئ او د کامیابئ چغې د صادِقانو په خېمو کښې اورېدے شی: ”د مالِک خُدائ ښى لاس زورَور کارونه کړى دی.

¹⁶د مالِک خُدائ ښے لاس ډېر اُوچت دے، د مالِک خُدائ ښى لاس زورَور کارونه کړى دی.“

¹⁷زۀ به نهٔ مرم خو ژوندې به يم، او هغه څهٔ چې مالِک خُدائ کړى دی بيانوم.

¹⁸مالِک خُدائ ماته سخته سزا راکړه، خو زهٔ هغهٔ مرګ ته حواله نهٔ کړم.

¹⁹هغهٔ ما دپاره د صداقت دروازې پرانستې دی، زۀ به په کښې وردننه شم او د مالِک خُدائ شکریه به ادا کړم.

²⁰دا د مالِک خُدا‎ئ دروازه ده، په کومه به چې صادِقان ور داخل شی.

²¹زهٔ به ستا شکر ادا کړم، ځکه چې تا ما ته جواب راکړے دے، تۀ زما خلاصُونکے جوړ شوې.

²²کوم کاڼے چې ګلکارانو رد کړے دے، هم هغه کاڼے د ګوټ سر کاڼے جوړ شوے دے.

²³دا کارونه مالِک خُدائ کړى دی، دا زمونږ په خيال حېرانوُونکے منظر دے.

²⁴دا هغه ورځ ده چې مالِک خُدائ جوړه کړې ده، نو راځئ چې خوشحالی وکړُو، او په کښې خوشحاله اوسو.

²⁵اے مالِکه خُدايه مونږه بچ کړه، اے مالِکه خُدايه مونږ ته کاميابى راکړه.

²⁶بختور دے هغه څوک چې د مالِک خُدائ په نوم راځی. د مالِک خُدائ د کور نه مونږ ستاسو برکت غواړُو.

²⁷مالِک خُدائ، خُدائ پاک دے، هغهٔ خپله رڼا په مونږ باندې وځلوله، قربانئ راولئ او په پړو يې د قربانګاه ښکرونو سره وتړئ.

²⁸تۀ مې خُدائ پاک يې او زۀ به ستا شکر ادا کړم، تۀ مې خُدائ پاک يې زۀ به ستا لوئې بيان کړم.

²⁹د مالِک خُدائ شکر ادا کړئ ځکه چې هغه ښۀ دے، د هغهٔ مینه د تل دپاره پاتې کیږی.