Read Pashto (Nangahari) — د پښتو مقدس کتاب زبور 119 Bible Online

زبور 119 - Pashto (Nangahari) — د پښتو مقدس کتاب bible

زبور 119

¹بختور دی هغوئ د چا کارونه چی بې داغه وی څوک چې د مالِک خُدای د شریعت په مطابق چلېږی.

²بختور دی هغوئ څوک چې د هغهٔ قانون ساتی او په خپل ټول زړهٔ سره د هغهٔ لټون کوی.

³دوئ بې اِنصافه کارونه نهٔ کوی، او دوئ د هغهٔ په نقش قدم ځی.

⁴مونږ ته تا د خپلو اصُولو په حقله حُکم وکړو چې هغه په پوره توګه وومنو.

⁵کاش چې زما لارې پخې شی چې زهٔ ستا شریعت د خپل ځان نه څرګند کړم.

⁶نو بيا به زۀ شرمنده نۀ شم ځکه چې زۀ ستا په ټولو حُکمونو باندې عمل کوم.

⁷زهٔ به ستا په رښتينې زړۀ سره شکر ادا کړم لکه څنګه چې زهٔ ستا صادِقه قانون زده کوم.

⁸زۀ به ستا اصُول منم، په پوره توګه ما رد نۀ کړې.

⁹په ځوانئ کښې به څنګه یو کس خپل عمل پاک وساتی؟ څوک چې ستا د کلام په مطابق اوسيږی.

¹⁰زۀ په پوره زړۀ سره ستا لټُون کوم، ما مۀ پرېږده چې ستا د حُکمونو نه بې لارې شم.

¹¹ستا کلام مې خپل زړۀ کښې ساتلے دے نو چې زۀ ستا خلاف ګناه ونۀ کړم.

¹²ټول ثناء صفتونه تا ته دی اے مالِکه خُدايه، ستا اصُول ما ته رايزده کړه.

¹³زهٔ په خپله خولهٔ د هغوئ بيان کوم هغه ټول قوانين کوم چې ستا د خولې نه صادر شوې دی.

¹⁴زهٔ ستا په اصُول منلو خوشحاله يم لکه څنګه چې یو سړے په ډیر مال دولت خوشحاله وی.

¹⁵زۀ ستا په تعلیماتو باندې غور کوم او ستا د لارو احترام کوم.

¹⁶زۀ ستا په اصُولو خوشحالېږم، او ستا کلام به زۀ نۀ هیروم.

¹⁷خپل خدمتګار سره ښۀ کوه نو زهٔ به داسې ژوندې یم، او زۀ به ستا په کلام باندې عمل کوم.

¹⁸سترګې مې پرانيزه چې زهٔ ووینم او ستا د قانون عجيبه حقائق وګورم.

¹⁹زۀ په دې زمکه مسافر يم، ما نه خپل حُکمونه مه پټوه.

²⁰زما ځان په غوښتو غوښتو ستړے شوے دے هر وخت ستا د قانون غوښتو دپاره.

²¹تۀ کبرژن او لعنتيان رټې او هغوئ څوک چې ستا د حُکمونو نه اوړيدلی دی.

²²ما نه د هغوئ کينه او سپکوالے لرې کړه، ځکه چې زۀ ستا قانون منم.

²³تر دې چې بادشاهان رایوځائ کیږی او زما خلاف خبرې کوی، خو ستا خدمتګار به ستا په قانون غور کوی.

²⁴ستا اصُول زما خوشحالی ده، او زما دپاره ښۀ نصیحت دے.

²⁵زۀ په خاورو کښې پروت يم، او په خپل کلام دې ما راژوندې کړه.

²⁶ما خپلې لارې تا ته ښکاره کړې او تا جواب راکړو، ما ته خپل اصُول راوښايه.

²⁷ما د خپل کلام په تعليماتو باندې پوهه کړه، نو ستا په عجيبه کارونو به بيا غور وکړم.

²⁸د غمه زما ځان کمزورے شوے دے، په خپل کلام دې ما له طاقت راکړه.

²⁹ما د دروغجنو لارو نه وساته، او د خپل شریعت په ښودلو کښې دې په ما مهربانى وکړه.

³⁰ما د رښتينوالئ لاره خوښه کړې ده، او ستا شریعت مې په خپل زړهٔ کښې ځائ کړے دے.

³¹مالِکه خُدايه ستا اصُول مې راټینګ کړی دی، ما شرمندګئ ته مۀ پرېږده.

³²زهٔ ستا د شریعت په لار روان یم، ځکه چې تا زما زړهٔ لوئ کړه.

³³اے مالِکه خُدايه ما ته وښایه چې ستا په شریعت عمل وکړم، زۀ هميشه به په هغې باندې عمل کوم.

³⁴نو ما ته ستا په شریعت باندې پوهه راکړه نو زهٔ به بیا پرې عمل کوم او په خپل ټول زړهٔ سره به پرې عمل کوم.

³⁵ما د خپلو حُکمونو په لارو باندې روان کړه، او چې زۀ په کښې خپله خوشحالی پیدا کړم.

³⁶زما زړۀ دې د خپل شریعت طرف ته راوګرځوه او د مال دولت لالچ طرف ته یې مۀ ګرځوه.

³⁷زما نظر د بې‌کاره څيزُونو نه واړوه، او د خپل کلام په مطابق دې ژوند راکړه.

³⁸خپله وعده دې د خپل خدمتګار سره پوره کړه، هغه وعده چې تا د هغه چا سره کړې وه څوک چې تا نه یریږی.

³⁹د کومې بې‌عِزتۍ نه چې يرېږم هغه زما نه اخو کړه، ځکه چې ستا شریعت ښهٔ دے.

⁴⁰زهٔ ستا د تعليماتو څومره خواهشمند یم، او په خپل صداقت کښې دې زما ژوند تازه کړه.

⁴¹خپله ابدى مینه دې ما له راکړه اے مالِکه خُدايه، او د خپلې وعدې په مطابق دې خلاصُون راکړه.

⁴²څوک چې ما ته پیغور راکوی نو بیا به زهٔ جواب ورکړم، ځکه چې زهٔ ستا په کلام باور کوم.

⁴³زما د خولې نه د حقیقت کلام مه اخله، ځکه چې ما خپل اُميد ستا په شریعت باندې وتړلو.

⁴⁴زهٔ به هر وخت ستا د شریعت تابعداری کوم، او د تل دپاره به یې منم.

⁴⁵زهٔ به په آزادۍ سره ګرځیږم، ځکه چې ما خپل ځان ستا حُکمونو ته وقف کړے دے.

⁴⁶زهٔ به ستا شریعت بادشاهانو ته بيان کړم زۀ به د چا نه هم نۀ شرمیږم.

⁴⁷ستا په حُکمونو کښې زما خوشحالی ده ځکه چې زما ورسره مینه ده.

⁴⁸ستا حُکمونه مې خوښيږى او عِزت يې کوم، او زهٔ ستا په اصُولو باندې سوچ کوم.

⁴⁹خپل خِدمتګار ته دې خپله خبره راياده کړه، ځکه چې دا زما اُميد دے.

⁵⁰زما په سختئ کښې هم دا زما تسلی ده، چې هم ستا وعده به ما ژوندې ساتی.

⁵¹کبرژن زما د حد نه زیات سپکاوے کوی، خو زهٔ به ستا د شریعت نه وانهٔ وړم.

⁵²اے مالِکه خُدايه ستا پخوانے شریعت ما ته یاد دے، او زما په دې باندې تسلی کېږی.

⁵³زۀ بدکارانو ته ډیرې غصې راخستے یم، هغوئ چا چې ستا شریعت پريښے دے.

⁵⁴ستا شريعت زما د سندرو مرکز دے په هر ځائ کښې چې زهٔ اوسيدلے یم.

⁵⁵اے مالِکه خُدايه په شپه کښې زهٔ ستا نوم یادوم، زۀ به ستا په شریعت باندې عمل کوم.

⁵⁶دا زما چال چلند وو، چې ستا په قانون باندې عمل وکړم.

⁵⁷تهٔ زما ميراث يې اے مالِکه خُدایه، ما دا وعده کړې ده چې ستا په شریعت به عمل کوم.

⁵⁸ما ستا د رضا په خپل ټول زړهٔ سره لټون کړے دے. د خپلې وعدې په مطابق په ما مهربانه اوسه.

⁵⁹ما په خپلو لارو باندې غور کړے دے او ما خپل قدمونه ستا قانون ته راګرځولى دی.

⁶⁰زهٔ به زړهٔ نا زړهٔ او ځنډ نهٔ کوم چې ستا حُکمونه ومنم.

⁶¹هر څو کۀ بدعمله مې په پړو تړل غواړى، خو زۀ به ستا شریعت نۀ هېروم.

⁶²په نيمه شپه راپاڅمه چې ستا شکر ادا کړم ستا د صادِقه شریعت دپاره.

⁶³هر څوک چې تا نه یریږی زهٔ د هغوئ ټولو ملګرے یم، او د هغوئ ټولو هم څوک چې ستا په شریعت عمل کوی.

⁶⁴زمکه ستا د ابدی مينې نه ډکه ده اے مالِکه خُدايه، ما ته د خپل اصُول سبق راوښایه.

⁶⁵د خپل خدمتګار سره دې ښهٔ وکړل د خپل کلام په مطابق اے مالِکه خُدایه.

⁶⁶ما ته ښهٔ عقل او پوهه راوښایه، ځکه چې زهٔ ستا په حُکمونو باور کوم.

⁶⁷د دې نه وړاندې چې تکلیف راورسيږی، بې لارې شوے وم، خو اوس ستا په کلام عمل کوم.

⁶⁸تۀ ښهٔ يې او نيک کارونه کوې، ما ته دې خپل اصُول راوښایه.

⁶⁹کۀ څهٔ هم چې مغرورانو په ما پورې دروغ تړلى دی، زهٔ د خپل ټول زړهٔ سره ستا اصُول ساتم.

⁷⁰د دوئ زړونه بې احساسه او بې رحمه دی، خو ستا په قانون کښې زهٔ خوشحاله یم.

⁷¹دا زما دپاره ښۀ وه چې په تکليف شوم نو دغه شان به زۀ ستا قانون زده کړم.

⁷²ستا د خولې خبره زما دپاره ډیر اهمیت لری په زرګونو د سپينو او سرو زرو سیکو نه.

⁷³تا زهٔ په خپلو لاسونو جوړ او تیار کړمه نو ما له پوهه راکړه چې ستا حُکمونه زده کړمه

⁷⁴هغه څوک چې تا نه يرېږى دوئ دې خوشحالی وکړى کله چې ما وګورى ځکه چې ما خپل اُميد ستا کلام پورې تړلے دے

⁷⁵زهٔ په دې پوهیږمه اے مالِکه خُدايه چې ستا شریعت صادِق دے او د خپلې وفادارۍ په وجه دې زۀ په تکليف کړے يمه

⁷⁶ستا نۀ ختمېدونکې مينه دې ما له تسلى راکړى د هغه وعدې په مطابق کومه چې تا د خپل خدمتګار سره کړې ده

⁷⁷په ما رحم وکړه چې زۀ ژوندې پاتې شمه ځکه چې ستا شریعت ما خوشحالوى

⁷⁸کبرژن دې په شرمونو وشرمیږی برناحقه په ما دروغ وائى خو زۀ ستا په لارښوونو باندې غور او فکر کومه

⁷⁹ما ته دې راشی څوک چې تا نه يرېږى هغوئ څوک چې ستا په شریعت باندې پوهیږی

⁸⁰زما زړهٔ دې ستا قانون منلو دپاره بې داغه وى نو داسې به زهٔ ونهٔ شرمیږمه

⁸¹ستا د خلاصُون په انتظار زما ځان کمزورے کیږى خو ما خپل اُميد ستا کلام پورې تړلے دے

⁸²ستا د وعدې په انتظار مې سترګې ړندې شوې زهٔ دا وایم چې، ”تهٔ به ما له تسلی کله راکوې؟“

⁸³زۀ په لوګې کښې لکه د مشک په شان اوچ شوے يم. خو ستا اصُول نۀ هېرومه

⁸⁴تر څو به ستا خِدمتګار انتظار کوى څوک چې زما سره زياتے کوى تۀ به کله سزا ورکوې

⁸⁵زما دپاره مغروران کنده جوړوى ځکه چې ستا د قانون مخالفت کوى

⁸⁶ستا ټول حُکمونه باوری دى زما مدد وکړه ځکه چې بې وجه ما خلق زوروى

⁸⁷زهٔ خو دوئ تقريباً د زمکې نه ورک کړے يمه خو ستا اصُول ما پرېښودې نۀ دى

⁸⁸د خپلې وفادارې مينې په مطابق دې زما ژوند وساته نو زۀ به ستا د خولې په تعليماتو عمل وکړمه

⁸⁹اے مالِکه خُدايه ستا کلام ابدی دے او دا په آسمانونو کښې قائم دے

⁹⁰ستا وفادارى به په ټولو نسلونو کښې وی تا زمکه پېدا کړه چې تر اوسه لا قائمه ده

⁹¹ستا شریعت تر نن ورځې پورې قائم دے نو ټول څیزونه ستا خِدمتګاران دى

⁹²کۀ چرے ستا شریعت زما خوشحالی نهٔ وے نو زۀ به په خپل مصيبت کښې تباه شوے ومه

⁹³زهٔ به هيڅ کله هم ستا تعليمات نۀ هېرومه ځکه چې په دوئ باندې تا زما ژوند تازه ساتلے دے

⁹⁴ما بچ کړه ځکه چې زۀ ستا يمه ما ستا د تعليماتو لټُون کړے دے

⁹⁵بدکاران زما د تباه کولو په انتظار کښې دى خو زۀ به ستا په قانون غور کومه

⁹⁶تر دې چې زهٔ د هر یو کامل کار څهٔ حد وينمه خو ستا د حُکمونو څهٔ حد نهٔ وینمه

⁹⁷خو ګوره زۀ ستا د قانون سره څومره مینه کومه او زۀ ټوله ورځ په دې باندې سوچ کومه

⁹⁸ستا حُکمونه ما د خپلو دشمنانو نه ډیر هوښياروی ځکه چې هغه ما سره د تل دپاره دى

⁹⁹زۀ د خپلو ټولو استاذانو نه ډیر هوښیار يمه نو ځکه زۀ ستا په شريعت غور کومه

¹⁰⁰زهٔ د مشرانو نه ډیره زیاته هوښیارتیا لرمه ځکه چې زهٔ ستا په شریعت عمل کومه

¹⁰¹ما د هرې بدې لارې نه خپل قدمونه ساتلى دى نو چې زهٔ ستا په کلام عمل وکړے شمه

¹⁰²زهٔ ستا د شریعت نه جدا شوے نهٔ يمه ځکه چې تا په خپله ما ته تعليم راکړے دے

¹⁰³ستا کلام زما دپاره څومره خوږ دے زما د خولې دپاره د شاتو نه ډېر خوږ دے

¹⁰⁴ما عقل ستا د تعلیماتو نه زده کړو نو په دې وجه د غلطو لارو نه نفرت کومه

¹⁰⁵ستا کلام زما د خپو دپاره ډيوه ده او زما د لارې دپاره رڼا ده

¹⁰⁶ما قسم خوړلے او په هغې ولاړ يم. چې زۀ به ستا په صادِق شريعت باندې عمل کومه

¹⁰⁷اے مالِکه خُدايه ما ډیر تکلیفونه تیر کړل د خپل کلام په مطابق دې زما ژوند تازه کړه

¹⁰⁸اے مالِکه خُدایه زما د خولې نه د اخلاص نه ډک ثناء صفت قبول کړه او د خپل شریعت تعلیم دې ما ته راکړه

¹⁰⁹کۀ څهٔ هم چې هر وخت خپل ژوند په خطره کښې اچومه خو زۀ به ستا شریعت نهٔ هیرومه

¹¹⁰بدکارانو ما ته دام خور کړے دے خو بیا هم زهٔ ستا د تعليماتو نه بې لارې نهٔ شومه

¹¹¹ستا منشور مې د تل دپاره ميراث دے دا زما د زړهٔ خوشحالی ده

¹¹²زما زړۀ ستا د حُکمونو په ساتلو بوخت دے او دا منشور به تر ابده پورې منمه

¹¹³زهٔ دوه مخیزه سړی نه کرکه کومه خو زۀ ستا قانون سره مینه کومه

¹¹⁴تۀ زما پناه او زما ډال يې ما خپل اُميد ستا د کلام پورې تړلے دے

¹¹⁵اے بدکارو خلقو ما نه لرې شئ چې زهٔ د خپل خُدائ پاک حُکمونو باندې عمل وکړمه

¹¹⁶د خپلې وعدې په مطابق دې ما سمبال کړه چې زهٔ ژوندې پاتې شمه او د خپل اُميد نه دې شرمنده نهٔ شمه

¹¹⁷ما ته سهاره راکړه نو زهٔ به بچ شمه نو بیا به زهٔ د تل دپاره ستا په شریعت غور کومه

¹¹⁸تهٔ هغوئ ټول ردکوې څوک چې ستا د شریعت نه اوړى او د هغوئ دوکه بلکل عبث ده

¹¹⁹تهٔ د دنيا ټول بدعمله لکه د خزلې په شان غورزوې نو په دې وجه زهٔ ستا قانون سره مینه کومه

¹²⁰ستا د یرې نه زما بدن رپى او زهٔ ستا د عدالت نه یریږمه

¹²¹ما هغه څۀ وکړل څۀ چې صداقت او اِنصاف وی ما خپلو دشمنانو ته مه پرېږده

¹²²خپل خدمتګار ته د ښهٔ ژوند ضمانت ورکړه کبرژن مه پریږده چې په ما ظُلم وکړی

¹²³ستا خلاصُون پسې سترګې مې ستړې شوې او ستا د رښتونې وعدې انتظار کومه

¹²⁴د خپل خدمتګار سره دې د خپلې مينې په مطابق سلوک وکړه او د خپلو اصُولو تعلیم دې ما ته راکړه

¹²⁵زهٔ ستا خِدمتګار یم ما له پوهه راکړه چې زهٔ ستا په قانون باندې پوهه شمه

¹²⁶اے مالِکه خُدایه اوس ستا د قدم اوچتولو دا وخت دے ځکه چې ستا قانون مات شوے دے

¹²⁷ځکه زۀ ستا د حُکمونو سره مينه کومه د سرو زرو نه زیاته او د خالص سرو زرو نه زیاته

¹²⁸او ځکه زهٔ ستا ټول تعليمات صحیح ګڼمه او زۀ د هر يوې خطا لارې نه نفرت کومه

¹²⁹ستا شریعت ښکلے دے نو ځکه زۀ په دې باندې عمل کومه

¹³⁰ستا د کلام تعليم نور ورکوی او جاهلانو خلقو ته پوهه ورکوى

¹³¹ستا د حُکمونو دومره تږے يمه چې د حُکمونو ارمانې دې يمه

¹³²ما ته راشه او په ما باندې رحم وکړه څنګه چې تهٔ همیشه د هغوئ سره مينه کوې، څوک چې ستا نوم سره مینه کوی

¹³³زما قدمونه ستا د کلام په لاره روان کړه او هیڅ قسمه ګناه دې په ما حکومت نهٔ کوی

¹³⁴ماته د اِنسان د ظُلم زور نه خلاصُون راکړه نو چې زهٔ ستا په تعلیماتو باندې عمل وکړمه

¹³⁵خپل د مخ رڼا دې په خپل خدمتګار باندې وځلوه او د خپل شریعت تعلیم دې ما ته راکړه

¹³⁶د اُوښکو سېلابونه مې د سترګو نه بهېږى ځکه چې ستا په شریعت باندې عمل نۀ کېږى

¹³⁷تهٔ صادِقه يې اے مالِکه خُدايه او ستا فیصلې د اِنصاف دى

¹³⁸کوم شریعت چې تا مقرر کړے دے هغه د صداقت نه ډک دے او هغه بلکل باوری دے

¹³⁹زما غیرت ما سوزوی ځکه چې زما دشمنانو ستا کلام هير کړے دے

¹⁴⁰ستا کلام ډیر پاک دے نو ځکه ستا خدمتګار د هغې سره مينه کوی

¹⁴¹کۀ څهٔ هم چې زهٔ ورکوټے او حقير يمه خو زهٔ ستا تعليمات نۀ هېرومه

¹⁴²ستا صداقت ابدی دے او ستا قانون رښتونے دے

¹⁴³غم او تکليف ما باندې راغلے دے خو ستا په حُکمونو کښې زما خوشحالى ده

¹⁴⁴ستا اصُول تر ابده صحیح دى ما له پوهه راکړه چې زۀ ژوندې پاتې شمه

¹⁴⁵د خپل ټول زړهٔ سره تا ته سوال زاری کومه جواب راکړه مالِک خُدايه زۀ به ستا په شريعت باندې عمل کومه

¹⁴⁶زۀ تا ته سوال کومه ما بچ کړه چې زۀ به ستا په شريعت باندې عمل کومه

¹⁴⁷سحر سبا راپاڅمه او د مدد دپاره تا ته سوال زارى کومه او زهٔ ستا په کلام خپل اُميد تړمه

¹⁴⁸ټوله شپه زما سترګې کولاو وی چې زهٔ ستا په وعدو باندې غور وکړمه

¹⁴⁹د خپلې مينې په مطابق دې زما آواز واوره د خپل رحم په مطابق دې زما ژوند بچ کړه اے مالِکه خُدايه

¹⁵⁰څوک چې بدې منصُوبې جوړوى ما ته رانزدې دى خو دوئ ستا د شریعت نه لری دى

¹⁵¹خو اوس تهٔ رانزدې یې اے مالِکه خُدايه او ستا حُکمونه ټول صحیح دى

¹⁵²ډېر د پخوا نه ما ستا د قانون نه زده کړی دى چې تهٔ هغه هميشه دپاره قائم ساتې

¹⁵³زما مصيبت ته وګوره او ما بچ کړه ځکه چې ما ستا قانون هېر کړے نۀ دے

¹⁵⁴په عدالت کښې زما دفاع وکړه او آزاد مې کړه او د خپلې وعدې په مطابق دې زما ژوند وساته

¹⁵⁵خلاصُون د بد عملو نه لرې دے ځکه چې هغوئ ستا د قانون لټون نهٔ کوی

¹⁵⁶ستا رحم ډیر لوئ دے اے مالِکه خُدايه او د خپل شریعت په مطابق دې زما ژوند بچ کړه

¹⁵⁷زما دشمنان ډیر دى څوک چې ما آزاروی خو زهٔ ستا د شریعت نه اوړيدلے نهٔ يم

¹⁵⁸زۀ به بې ایمانانو ته سپک ګورمه ځکه چې دوئ ستا په کلام عمل نهٔ کوی

¹⁵⁹او ګوره زهٔ ستا د حُکمونو سره څومره مينه کومه د خپلې ابدی مينې په مطابق دې زما ژوند بچ کړه اے مالِکه خُدايه

¹⁶⁰ستا ټول کلام رښتونے دے او ستا ټول صادِق کلام ابدی دے

¹⁶¹بادشاهان بې وجې ما آزاروی خو زما زړهٔ ستا په کلام د یرې نه درزېږى

¹⁶²زۀ ستا په وعدو کښې خوشحالی کومه لکه څوک چې پیدا کړی لویه خزانه

¹⁶³زهٔ دروغ بد ګڼم او ترې نه نفرت کومه خو زۀ ستا قانون سره مینه کومه

¹⁶⁴په ورځ کښې زۀ اوۀ ځله ستا ثناء وايمه ځکه چې ستا ټول شریعت د اِنصاف دے

¹⁶⁵هغوئ په لوئ امن کښې دى څوک چې ستا قانون سره مینه کوی او هيڅ څيز به هغوئ ته تيندک ورنهٔ کړی

¹⁶⁶زهٔ ستا د خلاصُون په انتظار یم اے مالِکه خُدايه او زۀ ستا په حُکمونو باندې عمل کومه

¹⁶⁷زهٔ ستا په تعلیماتو باندې عمل کومه ځکه چې زهٔ ورسره ډیره مینه لرمه

¹⁶⁸زهٔ ستا تعليماتو شريعت باندې عمل کومه ځکه چې تهٔ خبر یې زما د ټولو کارونو نه

¹⁶⁹زما سوال زاری دې تا ته در ورسیږی اے مالِکه خُدايه د خپل کلام په مطابق دې ما له پوهه راکړه

¹⁷⁰زما خواستونه دې تا ته درورسیږى د خپل کلام په مطابق دې ما له ژوند راکړه

¹⁷¹زما په ژبه دې ستا ثناء صِفت وى ځکه چې تا ما ته خپل قانون ښودلے دے

¹⁷²زما ژبه دې ستا د کلام سندرې ووایى ځکه چې ستا ټول حُکمونه صادِق دى

¹⁷³ستا لاس دې هر وخت زما د مدد دپاره تیار وی ځکه چې ما ستا شریعت غوره کړے دے

¹⁷⁴ستا د خلاصُون زهٔ ارمانى يمه اے مالِکه خُدايه او زهٔ ستا په شریعت کښې خوشحاله يمه

¹⁷⁵ما ته ژوند راکړه تر څو ستا ثنا صفت وکړمه او ستا قانون دې ما وساتى

¹⁷⁶زۀ د ورکې شوې ګډې په شان بې لارې شوے يمه خپل خِدمت کوُونکے دې ولټوه ځکه چې ما هير کړی نهٔ دی ستا حُکمونه.