Read Pashto (Nangahari) — د پښتو مقدس کتاب زبور 135 Bible Online

زبور 135 - Pashto (Nangahari) — د پښتو مقدس کتاب bible

زبور 135

¹د مالِک خُدائ ثناء صفت وکړئ، د مالِک خُدائ د نوم ثناء صفت وکړئ، اے د مالِک خُدائ خدمتګارانو تاسو د هغۀ ثناء صِفت وکړئ،

²تاسو څوک چې د مالِک خُدای کور کښې خِدمت کوئ، زمونږ د خُدائ پاک د کور په دربار کښې.

³د مالِک خُدائ ثناء صفت وکړئ ځکه چې مالِک خُدائ ښۀ دے، د هغهٔ د نوم ثناء صفت وکړئ. ځکه چې ډیره مزه کوی.

⁴ځکه چې مالِک خُدائ یعقوب غوره کړو، د دې دپاره چې هغه د هغهٔ شی، او بنی اِسرائيل چې د هغهٔ خاص ملکیت شی.

⁵زهٔ پوهیږم چې مالِک خُدائ لوئ دے، زمونږ مالِک خُدائ د نورو ټولو معبودانو نه لوئ دے.

⁶مالِک خُدائ هغه څهٔ کوی څهٔ چې هغه خوشحالوی، په ټوله زمکه او آسمانونو کښې، په سمندرونو کښې او د هغهٔ په ټولو ژورو ځایونو کښې.

⁷د زمکې د آخر سر نه هغه وريځې راپورته کوی، او هغه د باران سره برېښنا رالیږی او هغه هوا د خپلو ذخیرو نه رالوځوی.

⁸هغهٔ وړومبی پیدا شوی ماشومان ووژل د مصریانو، وړومبی پیدا شوی د سړو او د ځناورانو.

⁹هغهٔ په مصر کښې معجزې او عجيبه کارونه وکړل، د فرعون او د هغۀ د ټولو نوکرانو په خلاف.

¹⁰هغهٔ ډيرو قومونو ته شکست ورکړو او هغۀ طاقتور بادشاهان ووژل،

¹¹د امور بادشاه سيحون د بسن بادشاه عوج، هغۀ د کنعان ټول بادشاهان ووژل.

¹²او هغهٔ د هغوئ ملک په میراث کښې ورکړو، او خپلو خلقو بنى اِسرائيلو ته يې په میراث کښې ورکړو.

¹³ستا نوم مالِکه خُدایه د تل دپاره یادیږی، او ستا نوم به په ټولو نسلونو کښې یادیږی.

¹⁴ځکه چې مالِک خُدائ د خپلو خلقو اِنصاف کوی، او هغه په خپلو خدمتګارانو رحم کوی.

¹⁵د قومونو بُتان چې د سرو زرو او سپینو نه جوړ شوی دی، د اِنسانانو په لاسونو جوړ شوی دی.

¹⁶د هغوئ خولې شته خو خبرې نهٔ شی کولے، د هغوئ سترګې شته خو ليدل نهٔ شی کولے،

¹⁷د هغوئ غوږونه شته خو اورېدل نۀ شى کولے، او نۀ هغوئ په خولهٔ ساه اخستلے شی.

¹⁸څوک چې دا بُتان جوړوى دوئ به هم د دې په شان وی څوک چې پرې ايمان لرى هغوئ به هم د دې په شان وی.

¹⁹اے د بنی اِسرائيل خاندانه د مالِک خُدائ ثناء ووایئ، اے د هارون خاندانه د مالِک خُدائ ثناء ووایئ،

²⁰اے د ليويانو کورنئ د مالِک خُدائ صِفت کوئ، او تاسو څوک چې د مالِک خُدائ نه يرېږئ د مالِک خُدائ ثناء صِفت کوئ،

²¹د صيون نه دې د مالِک خُدائ ثناء صفت وی، هغۀ ته دې ثناء صفت وى څوک چې په یروشلیم کښې اوسېږى. د مالِک خُدائ ثناء صفت وکړئ.