Read Pashto (Nangahari) — د پښتو مقدس کتاب زبور 136 Bible Online

زبور 136 - Pashto (Nangahari) — د پښتو مقدس کتاب bible

زبور 136

¹د مالِک خُدائ شکرګذاری وکړئ، ځکه چې هغه ښهٔ دے. د هغهٔ مینه ابدی ده.

²د خُدائ پاک شکر ګذاری وکړئ، چې د خُدايانو خُدائ پاک دے. د هغهٔ مینه ابدی ده.

³د مالِک خُدائ شکر ګذاری وکړئ چې د مالِکانو مالِک خُدائ دے. د هغهٔ مینه ابدی ده.

⁴د هغهٔ شکر ګذاری وکړ‎ئ چې صرف هغه لويې معجزې کوی، د هغهٔ مینه ابدی ده.

⁵او هغه چا چې آسمانونه يې په حُکمت سره پیدا کړل، د هغهٔ مینه ابدی ده.

⁶او د هغهٔ شکر ګذاری وکړئ چا چې زمکه د اوبو دپاسه خوره کړله، د هغهٔ مینه ابدی ده.

⁷او د هغهٔ شکر ګذاری وکړئ چا چې آسمانى رڼا ګانې پیدا کړې، د هغهٔ مینه ابدی ده.

⁸نمر په ورځ باندې بادشاهى کوی، د هغهٔ مینه ابدی ده.

⁹سپوږمۍ او ستورى په شپه باندې حکومت کوی، د هغهٔ مینه ابدی ده.

¹⁰د هغهٔ شکر ګذاری وکړئ چا چې مصریانو ته وړومبی پیدا شوی هلاک کړل، د هغهٔ مینه ابدی ده.

¹¹هغهٔ بنى اِسرا‎ئیل د مصر د مينځ نه راوویستل، د هغهٔ مینه ابدی ده.

¹²چا چې په هغه وخت د خپل طاقت او قدرت څرګندونه وکړه، د هغهٔ مینه ابدی ده.

¹³او د هغهٔ شکر ګذاری وکړئ چا چې بحرِقُلزم په مينځ دوه کړو، د هغهٔ مینه ابدی ده.

¹⁴او هغهٔ بنى اِسرائيل د دې په مينځ کښې بوتلل، د هغهٔ مینه ابدی ده.

¹⁵خو فِرعون سره د نوکرانو په بحرِقُلزم کښې غرق شو، د هغهٔ مینه ابدی ده.

¹⁶او د هغهٔ شکر ګزاری وکړئ چا چې دَ خپلو خلقو په بيابان کښې لاره ښودنه وکړله، د هغهٔ مینه ابدی ده.

¹⁷د هغهٔ شکر ګذاری کوئ چا چې لوئ بادشاهان رانسکور کړل، د هغهٔ مینه ابدی ده.

¹⁸او هغهٔ تکړه بادشاهان هلاک کړل، د هغهٔ مینه ابدی ده.

¹⁹سیحون د امور بادشاه يې مړ کړلو، د هغهٔ مینه ابدی ده.

²⁰عوج د بسن بادشاه يې مړ کړلو، د هغهٔ مینه ابدی ده.

²¹او هغهٔ د هغوئ ملک دوئ ته په میراث کښې ورکړو، د هغهٔ مینه ابدی ده.

²²او په میراث کښې يې خدمتګار بنى اِسرائيل ته ورکړو، د هغهٔ مینه ابدی ده.

²³د هغهٔ شکر ګذاری وکړئ چا ته چې مونږ د کمزورتيا په حالت کښې یاد وُو، د هغهٔ مینه ابدی ده.

²⁴او مونږ يې د خپلو دشمنانو نه خلاص کړلو، د هغهٔ مینه ابدی ده.

²⁵او څوک چې هر یو مخلوق ته رزق ورکوی، د هغهٔ مینه ابدی ده.

²⁶د آسمانونو د خُدائ شکر ادا کړئ، د هغهٔ مینه ابدی ده.