Read Pashto (Nangahari) — د پښتو مقدس کتاب زبور 140 Bible Online

زبور 140 - Pashto (Nangahari) — د پښتو مقدس کتاب bible

زبور 140

¹اے مالِکه خُدايه، د بدکارانو نه ما بچ کړه، او د ظالمانو اِنسانانو نه ما وساته،

²او څوک چې د شرارت منصُوبې په خپلو زړونو کښې جوړوی او هره ورځ جنګ توده وی.

³دوئ خپلې ژبې لکه د ښامار په شان تیروی، او د چمچمار زهر يې په شونډو پراتۀ وی.

⁴اے مالِکه خُدایه، ما د بدکارانو د لاس نه محفوظ کړه، او ما د ظالمانو نه بچ کړه، څوک چې زما د خپو ګیرولو دپاره منصُوبې جوړوی.

⁵کبرژنو سړو ما ته پټ دامونه ايښې دی، او دوئ خپل جالونه خوارۀ کړی دی. او زما په لارو کښې يې دامونه ایښې دی.

⁶ما مالِک خُدائ ته ووئیل، تهٔ زما خُدائ پاک يې. اے مالِکه خُدايه، د رحم دپاره زما سوال زاری واوره.

⁷اے قادره مالِکه خُدایه، زما قوی خلاصُونکیه، څوک چې د جنګ په ورځ زما سر پټوی.

⁸د بدکارانو آرمانونه تهٔ مۀ پوره کوه، اے مالِکه خُدايه، او د دوئ منصُوبې کامیابیدو ته مه پریږده، هسې نه چې دوئ مغروره شی.

⁹او څوک چې ما نه راتاو دی د هغوئ سرونه دې په مصيبت کښې راګیر شی، او په هغه مصيبت کښې چې کوم د هغوئ شونډو جوړ کړے دے.

¹⁰بلې شوې سکروټې دې په هغوئ راپریوزی، او هغوئ دې په اور کښې وغورزولے شی، او هغوئ دې چکړو دلدل ته وغورزیږی چې بیا ترې راوتلے نهٔ شی.

¹¹غیبت کوونکې دې په دې ملک کښې کامیاب نهٔ شی، او په ظالمانو دې ناګهانه آفت راشی.

¹²زهٔ په دې پوهیږمه چې مالِک خُدائ به غريبانانو ته اِنصاف ورکړی، او هغه د حاجتمندو مقدمه په خپل لاس کښې اخلی.

¹³او بې شکه چې نېکان به ستا د نوم ثناء صِفت وکړی، او صادِقان به ستا په حضُور کښې ژوند وکړی.