Read Pashto (Nangahari) — د پښتو مقدس کتاب زبور 141 Bible Online

زبور 141 - Pashto (Nangahari) — د پښتو مقدس کتاب bible

زبور 141

¹اے مالِکه خُدایه، زهٔ تا ته سوال زارى کومه ماله زر راشه، زما آواز اوره کله چې زهٔ درته سوال کوم.

²زما دعا دې ستا په حضُور کښې د خوشبو په شان شی، او زما د لاسونو اوچتول دې تا ته لکه د ماښام د قربانئ په شان قبول شی.

³اے مالِکه خُدایه، زما خولهٔ قابو کړه، او زما په شونډو باندې نظر وساته.

⁴زما زړۀ دې په بدو لارو لاړ نۀ شی، او نۀ دې د بدکارو په کارونو کښې حِصه واخلی. او نۀ دې خطاکارو سره مل شی، ما د هغه خلقو د خوندور خوراکونو د خوړولو نه وساته.

⁵کۀ نيک سړے ما وډبوی دا به مهربانې وی، او د هغۀ رټل به زما دپاره په سر باندې د تیلو په شان وی، او زما سر به د دې تیلو نه انکار نهٔ کوی، خو زما دعا به هميشه د بدعملو د کارونو په خلاف وی.

⁶کله چې د دوئ بادشاهان د کمروونو نه راوغورزیږی، نو بدعمله به دا زده کړی چې زما وېنا خوږه وه.

⁷لکه څنګه چې د زمکې په قلبې سره کاڼی برسيره شی، نو دغه شان به زمونږ هډُوکى د قبر په خولهٔ کښې خوارۀ وارۀ پراتۀ وی.

⁸خو زما سترګې ستا په طرف دی، اے قادر مطلق خُدایه، او ستا نه پناه غواړم ما مرګ ته مه حواله کوه.

⁹ما د هغه لټ نه وساته کوم چې دوئ زما دپاره ايښے دے، ما د هغه دامونو نه وساته چې بدعملو زما دپاره خوارهٔ کړی دی.

¹⁰بدعمله دې په خپلو دامونو کښې راګیر شی، چې دا شان زهٔ ترې بچ شمه.