Read Pashto (Nangahari) — د پښتو مقدس کتاب زبور 146 Bible Online

زبور 146 - Pashto (Nangahari) — د پښتو مقدس کتاب bible

زبور 146

¹د مالِک خُدائ ثناء صِفت دې وی. د مالِک خُدائ ثناء صفت وکړه، اے زما ځانه.

²زۀ به په خپل ټول ژوند کښې د مالِک خُدائ ثناء صفت کوم، او تر څو چې زۀ ژوندې یم د مالِک خُدائ ثناء صفت به کوم.

³او په شاهزادګانو باندې توکل مه کوئ، په فانى اِنسان توکل مۀ کوئ څوک چې خلاصُون نهٔ شى ورکولے.

⁴کله چې ترې روح وځی نو خاورو سره خاورې شی، او په هم هغه ورځ يې ټولې منصُوبې خرابې شی.

⁵بختور دی هغوئ د چا مدد چې د یعقوب خُدائ دے، او د چا اُميد چې په مالِک خُدائ د هغهٔ په خُدائ پاک وی.

⁶ځکه چې هغۀ آسمانونه او زمکه، سمندر او څۀ چې په کښې دی پیدا کړى دى او هغه همیشه وفادار دے.

⁷هغه په خپله د مظلومانو مقدمه چلوی، او اوږی ته خوراک ورکوی. مالِک خُدائ قيديان آزادوی.

⁸مالِک خُدائ ړندو ته نظر ورکوی. او هغه ټول راکونټی شوې راوچته وی، مالِک خُدائ د صادِقانو سره مينه کوی.

⁹مالِک خُدائ د مسافرو خيال ساتی، او یتیمانو او کُنډو ته خوراک ورکوی، خو هغه د بدعملو منصُوبې او طریقې خرابوی.

¹⁰مالِک خُدائ د تل دپاره بادشاهت کوی، د ټولو نسلونو دپاره اے صيونه. د مالِک خُدائ ثناء صِفت دې وی.