Read Pashto (Nangahari) — د پښتو مقدس کتاب زبور 147 Bible Online

زبور 147 - Pashto (Nangahari) — د پښتو مقدس کتاب bible

زبور 147

¹د مالِک خُدائ ثناء صفت وکړئ. دا څومره ښۀ ده چې مونږ د خپل خُدائ پاک ثنا صفت ووایُو، او څومره د خوښې خبره ده چې مونږ د هغهٔ ثناء وکړُو.

²مالِک خُدائ يروشليم بيا آبادوی، هغه د بنی اِسرائيلو شړلى خلق راغونډوی.

³هغه مات زړونه روغوی، او د هغوئ په زخمونو پټئ لګوی.

⁴هغهٔ ته د ټولو ستورو د شمېر پته ده، او هر یو ستورى ته په نامه آواز کوی.

⁵زمونږ مالِک خُدائ لوئ او په طاقت کښې زورَور دے، او د هغهٔ د پوهې څهٔ حد نشته دے.

⁶مالِک خُدائ د عاجزانو ساتنه کوی، خو شريران زمکې ته راغورزوی.

⁷په شکر ګذارئ سره د خُدائ حمد و ثناء ووايئ، او زمونږ خُدائ پاک ته په رباب سره ساز وغږوئ.

⁸هغه آسمان په وریځو باندې پټوی، او هغه په زمکه بارانونه راوروی، او په غرونو او غونډو باندې واښهٔ را شنهٔ کوی.

⁹هغه ځناورو ته خوراک ورکوی، او کارغانو بچو ته کله چې وچغیږی خوراک ورکوی.

¹⁰د هغهٔ خوشحالى د اَس په طاقت کښې نهٔ ده، او نۀ د هغهٔ خوشحالى د اِنسان په طاقت کښې ده.

¹¹او مالِک د هغوئ نه خوشحاله وی څوک چې د هغهٔ نه یریږی، او څوک چې د هغهٔ په نهٔ ختمیدونکې مینه باندې اُميد ساتی.

¹²د مالِک خُدائ لویی بيان کړه، اے يروشليمه، د مالِک خُدائ ثنا صفت ادا کړه، اے صيونه.

¹³او هغه ستا د دروازو اړمونه او درشلونه مضبوطوی، او په تا کښې اوسيدونکو ته برکت ورکوی.

¹⁴هغه ستا سرحدونه په سلامتۍ کښې ساتی، او د ټولو نه په ښو غنمو باندې دې معموروی.

¹⁵هغه چې خپل احکام زمکې ته ورولیږی، نو د هغهٔ حُکم په منډه خوریږی.

¹⁶هغه واوره لکه د وړۍ خوروی، او واوره لکه د ایرو په شان ځغلوی.

¹⁷هغه د کاڼو په شان ږلۍ وروی د هغهٔ د واورې طوفان ته څوک ټینګیدے شی؟

¹⁸هغه خپل کلام رالیږی او واوره پرې ویلې کیږی، هغه خپلې هواګانې رالیږی اوبۀ ترې راروانې شی.

¹⁹هغهٔ خپل کلام یعقوب ته ورښکاره کړو، او خپل شریعت او قانون يې بنی اِسرائيلو ته ښکاره کړو.

²⁰هغهٔ داسې د بل قوم دپاره کړی نهٔ دی، هغوئ د دهٔ په شریعت نۀ پوهېږی. د مالِک خُدائ ثناء صِفت کوئ.