Read Pashto (Nangahari) — د پښتو مقدس کتاب زبور 148 Bible Online

زبور 148 - Pashto (Nangahari) — د پښتو مقدس کتاب bible

زبور 148

¹د آسمانونو نه د مالِک خُدائ ثناء صفت وکړئ، د هغۀ ثناء صِفت په اوچتو آسمانونو کښې وکړئ.

²د هغهٔ ټولو فرښتو د هغهٔ ثناء صفت وکړئ، ټولو آسمانى مخلوقاتو د هغهٔ ثناء صفت وکړئ.

³اے نمر او سپوږمۍ د مالِک خُدائ ثناء صِفت وکړئ، ټولو ځلیدونکو ستورو د هغهٔ ثناء صفت وکړئ.

⁴اُوچتو آسمانونو د هغۀ ثناء صِفت وکړئ، په آسمان کښې بره اوبو د هغهٔ ثناء صفت وکړئ.

⁵هغوئ ټول دې د مالِک خُدائ د نوم ثناء صِفت وکړی، ځکه چې د هغهٔ په حُکم دوئ پیدا شوی دی.

⁶او هغوئ يې د تل دپاره په خپل ځایونو باندې مقرر کړې دی، او هغهٔ ورته قانون مقرر کړو چې هیڅ کله نهٔ ختمیږی.

⁷د زمکې نه د مالِک خُدائ ثناء صفت وکړئ، اے د لویو سمندرونو مخلوقه او د ټولو سمندرونو لاندې بيخ کښې چې اوسېږئ.

⁸بریښنا او ږلۍ، واورو او وريځو، طوفانی بادونو چې تاسو د هغهٔ حُکم منئ.

⁹تاسو غرونو او ټولو غونډیو، میوه دارو ونو او ټولو دیارونو.

¹⁰ځنګلى ځناورو او ټولو څاروو، ښوئېدونکې مخلوقه، او د هوا مارغانو،

¹¹د زمکې بادشاهانو او ټولو قومونو، تاسو ټولو شهزادګانو او د دنيا بادشاهانو،

¹²اے ټولو ځوانانو او پېغلو، بوډاګانو او ماشومانو.

¹³ټول دې د مالِک خُدائ د نوم لوئى بيانوی، ځکه چې صرف د هغهٔ نوم لوئ دے، او د هغهٔ شان او شوکت په زمکې آسمانونو باندې دے.

¹⁴هغۀ خپل قوم دپاره د فخر ښکر پورته کړے دے، تر څو د هغۀ ټول نيک او مقدس خلق د هغهٔ ثناء صفت بيان کړی، یعنې بنی اِسرائيل چې هغهٔ ته نزدې دی. د مالِک خُدائ ثناء صِفت دې وی.