Read Pashto (Nangahari) — د پښتو مقدس کتاب زبور 149 Bible Online

زبور 149 - Pashto (Nangahari) — د پښتو مقدس کتاب bible

زبور 149

¹د مالِک خُدائ ثناء صفت بيان کړئ. مالِک خُدائ ته یو نوے سرود ووایئ، د هغۀ ثناء صفت د هغهٔ د مؤمينانو په ډله کښې بيان کړئ.

²بنی اِسرائيل دې د خپل خالق سره خوشحالى وکړی، د صيون خلق دې د خپل بادشاه سره خوشحاله وی.

³هغوئ دې د هغهٔ د نوم ثناء صفت په ګډا کښې بيان کړی، او هغهٔ ته دې په تمبل او رباب سره موسیقی وغږوی.

⁴ځکه چې مالِک خُدائ د خپلو خلقو سره خوشحالیږی، او هغه عاجزانو ته د خلاصُون تاج ور په سروی.

⁵مقدسین دې د هغهٔ په عزت ورکولو سره خوشحاله شی، او په خپلو بسترو کښې دې د خوشحالئ سندرې وايى.

⁶د خُدائ پاک ثناء صِفت دې د هغوئ په خُلو باندې وی او دوه مخيزه تُوره دې د هغوئ په لاسونو کښې وی،

⁷تر څو په زور سره د قومونو نه بدل واخلی، او چې د هغوئ خلقو ته سزا ورکړی،

⁸چې د هغوئ بادشاهان په هتکړُو کښې وتړی او د هغوئ مشران دې په بيړو کښې وتړی،

⁹او چې څنګه فیصله د هغوئ په خلاف لیکلے شوې ده هغه شان وشى. دا د هغهٔ ټولو مقدسینو ته جلال دے. د مالِک خُدائ ثناء صِفت دې وى.