Read Pashto (Nangahari) — د پښتو مقدس کتاب زبور 25 Bible Online

زبور 25 - Pashto (Nangahari) — د پښتو مقدس کتاب bible

زبور 25

¹څښتنه تاته تسلیمومه زه ځان

²زما خدایه، توکل دی زما په تا مه پرېږده مې شرمنده شم مه پرېږده مې دښمنان راباندې بر شي

³چې په تا کوي توکل هغه دې نه شي شرمنده بې سببه چې خیانت کړي شي هغوی دې شرمنده

⁴ای څښتنه، خپلې لارې دې راوښایه وماته طریقې د ژوند رازده کړه خپلې ماته

⁵حقیقي لاره راوښایه ما پوه کړه ځکه ته زما ژغورونکی خدای یې تل په تا باندې توکل کړم

⁶در په یاد کړه ای څښتنه هغه خپل رحم او تلپاتې مینه چې دې کوله د ازله ځنې

⁷سرکشۍ او خطاګانې د ځوانۍ مې کړه در هېرې در په یاد مې کړه څښتنه په تلپاتې مینې خپلې مهربان یې ای څښتنه مهربان یې

⁸څښتن نېک دی او عادل دی ګناهکارو ته ورښایي سمه لاره

⁹عاجزانو ته ورښایي نېغه لاره طریقه خپله ورښایي و هغوی ته

¹⁰هغو خلکو ته به وکړي لارښودنه په وفا او محبت چې ولاړ د ده په لوظ وي او مني د ده حکمونه

¹¹د خپل پاک نوم په خاطر دې ای څښتنه ګناهونه زما معاف کړه ځکه زیات دي

¹²هغه څوک چې کوي وېره د څښتن هغه وبه ښایي هغه ته سمه لاره

¹³دی همېش به وي سوکاله اولاده به یې د ځمکې وارثان شي

¹⁴دی څښتن ملګری د هغو خلکو څوک چې کوي وېره د هغه ځنې دی به هغوی سره خپل لوظ کړي قایم

¹⁵سترګې په لار یمه همېش زه خپل څښتن ته د کومک دپاره ځکه هغه مې خلاصوي له هر ایښودي دامه

¹⁶زما په لوري نظر وکړه ای څښتنه رحم وکړه په ما ځکه چې زه یمه تنها او هم مظلوم یمه زه

¹⁷له اندیښنو څخه آرام راکړه ټولو دردونو نه نجات راکړه

¹⁸زما غمونو، کړاونو ته نظر وکړه ته او ګناهونه راته وبخښه ټول

¹⁹ګوره څومره زیات دي دښمنان زما ګوره څومره سخت کوي نفرت له ما

²⁰ته مې وساته خلاصون راکړه وماته مه پرېږده چې شرمنده شم له همدې وجې پناه راوړمه تاته

²¹کړي نېکي او صداقت دې زما ساتنه ځکه چې زه کوم توکل په تا

²²ته کړه خلاص ای پاکه خدایه اسراییل له خپلو ټولو تکلیفونو