Read Pashto (Nangahari) — د پښتو مقدس کتاب زبور 31 Bible Online

زبور 31 - Pashto (Nangahari) — د پښتو مقدس کتاب bible

زبور 31

¹ما پناه راوړې تاته ای څښتنه! مه پرېږده مې ته هیڅکله خجالت ته ته عادل یې زما خدایه زه دعا کومه تاته ته نجات راکړه وماته

²ونیسه غوږ ماته واوره زما دعا ژر شه ماته نجات راکړه زما دپاره پناه ځای شه چې ساتنه زما وکړې ته زما قوي کلا شه چې نجات و ماته راکړې

³ته زما کلا او پناه ځای یې ته ته د خپل نوم په خاطر وکړه هدایت او لارښوونه راته

⁴ما له هغه دامه وساته چې دوی دی راته ایښی ځکه ته مې پناه ځای یې

⁵زه خپل ځان وتاته سپارم ما به وژغورې څښتنه وفادار یې ته ای خدایه

⁶له هغو خلکو څخه کرکه کوم چې عبادت کړي د بتانو بې ارزښتو څخه خو زه په تا باندې توکل کومه

⁷زه به خوشحاله یم خوښي به کوم ستا په تل موجوده مینه ځکه چې تا زما درد ولیدلو او د تکلیف نه مې خبر شولې

⁸زه دې ورنکړم په لاس د دښمنانو آزادي دې راته راکړه کوم ځای غواړم هلته تلی شم

⁹رحم وکړه په ما باندې ای څښتنه ځکه یمه په تکلیف کې زما سترګې ستړې شوې له ژړا نه زه بېخي یمه ستومانه

¹⁰ژوند مې شو په غم تالا د ژړا له لاسه عمر مې لنډ شوی زه مې خپلو کړاونو کړم کمزوری ان هډوکي مې له کاره دي وتلي

¹¹راته په سپکه سترګه ګوري دښمنان ټول زما په تېره بیا ګاونډیان هغوی چې پیژني ما زړه یې چوي له ما څخه کله چې دوی مې په کوڅه کې ویني دوی کاندي تېښته له ما

¹²زه هرچا یمه هېر کړی لکه مړی چې څوک هېر کړي زه په شان یم د کودړي چې چا لیرې غورزولی

¹³کړي ګونګوسي راپسې ډېر دښمنان اورم یې زه له هرې خوا راباندې وېره ډېره دوی پلانونه زما په ضد جوړوي هم جوړوي مې د مرګي دسیسې

¹⁴خو توکل زما په تا دی ای څښتنه زه دا وایم ته مې خدای یې

¹⁵زما ژوند دی ستا په لاس کې دښمنانو نه مې خلاص کړه او له هغو نه مې خلاص کړه چې په ما پسې تعقیب کړي

¹⁶خپل بنده باندې دې ته شه مهربانه ته مې وژغوره په مینه دې تلپاتې

¹⁷ته مې مه پرېږده څښتنه چې خجل شم ځکه تاته زه فریاد کړم بدکاران دې خجالت شي پټه خوله دې دوی شي کوز خپلو قبرو ته

¹⁸د هغوی درواغجنې ژبې دې شي غلې چې مغرور او کبرجن دي چې نېکانو پسې کړي سپکې خبرې

¹⁹څه عجیبه دا ښه شیان دي چې تا ساتلي دي هغو ته چې کړي وېره له تا هر یو پوهیږي چې ته څومره نېک یې څنګه ته ساتې هغوی چې غواړي پناه تا نه

²⁰ته هغوی د نورو خلکو دسیسو نه خپل حضور کې خوندي ساتې دوی د خپلو دښمنانو له تورونو په ډاډمنه پناه ځای کې پټ ساتې

²¹ثناه او صفت دې وي څښتن ته! کله چې زه په کلا بند ښار کې ګېر شوی ومه څه عجیبه مینه یې وکړله له ما سره

²²زه ویریدلی وم او خیال مې کاوه چې ستا حضور ځنې زه لیرې شړل شوی یمه خو کله ما چې فریاد وکړ د کومک دپاره نو تا زما دعا قبوله کړله

²³ای خپل څښتن ته وفادارو خلکو ده سره مینه وکړئ څښتن ساتنه کوي د وفادارو خلکو خو کبرجنو ته سزا د خپل عمل ورکوي

²⁴اوسئ ځواکمن او زړور ای خلکو ټول هغه چې هیله له څښتن لرئ