Read Pashto (Nangahari) — د پښتو مقدس کتاب زبور 37 Bible Online

زبور 37 - Pashto (Nangahari) — د پښتو مقدس کتاب bible

زبور 37

¹په سبب د بد کارانو تشویش مکړه څوک چې کړي غلط کارونه په هغو ته حسد مکړه

²د وښو په شان به دغه خلک ژر وچ شي داسې به مړاوي شي چې څنګه بوټي شنه وچیږي

³کړه توکل دې په څښتن کوه نېکي نو خپل وطن کې دې اوسیږه خوند د امن اخله

⁴لټوه ته خوشحالي دې په څښتن کې هغه به ستا د زړه آرزو کړي پوره

⁵خپله لاره دې ته وسپاره څښتن ته وکړه توکل په هغه باندې مرسته ستا به وکړي

⁶کړي به سهار په څېر روښانه معصوموالی ستا وبه ځلوي دې رښتینوالی غرمې لمر په څېر

⁷وکړه انتظار غلی څښتن په مخ کې صبر شه اندیښنه مکړه د هغه چا په هکله چې خوشبخت دی یا هغه چې دی کامیاب په خپلو بدو پلانو کې

⁸مه په قهریږه غوسه کېږه مه مه کړه سودا ځکه بدۍ ته به دې بوځي سودا

⁹شي بدکاران به ټول له منځه لاړ خو څوک چې کاندي توکل په څښتن ځمکه به شي د هغوی

¹⁰تری تم به په لږ وخت کې بدکاران شي نه به پیدا کیږی که هر څومره یې لټون کوې

¹¹عاجزان خلک به د ځمکې وارثان شي د سوکالۍ او آرامۍ نه به خوندونه اخلي

¹²بدکاره خلک د نېکانو مقابل کې دسیسې جوړوي او دوی ته چیچي د نفرت غاښونه

¹³مګر څښتن کوي خندا په بد کارانو پسې ځکه څښتن ویني د هغوی ورځ راروانه ده

¹⁴رااوباسي خپلې تورې بدکاران او راکاږي یې لیندې چې عاجزان او محتاج خلک مړه کړي چې کاندي قتل هغه خلک چې سم کارونه کوي

¹⁵تورې د هغوی به غوڅوي د هغوی خپل زړونه ماتې به لیندې شي د هغوی لیندې به ماتې شي

¹⁶که وي کمه شتمني د نېک سړي ډېرو بد کارو د دولت ځنې بهتره ده دا

¹⁷ځکه لاسونه د بد کارو به څښتن ورمات کړي خو حمایه کړي د نېکانو خلکو

¹⁸ورځ په ورځ څښتن ساتي نېک بندګان تل مدام به وي د ځمکې واکداران

¹⁹د سختیو په وختونو کې به دوی سرټیټي نه شي هم به ماړه وي د قحطۍ په وخت کې

²⁰خو بد کاران به مړه شي شي دښمنان به د څښتن پناه د سترګو څخه وحشي ګلانو په شان د لوګي په شان به ورک شي

²¹بد کاران اخلي پورونه او بیا نه یې خلاصوي خو نېکان ورکړه کوي په سخاوت

²²چې د څښتن له خوا نه چاته برکت ورکړل شي ځمکه به دوی کړي خپله مګر په چا چې وي لعنت د هغه هغوی به وشړل شي

²³په هغه لار چې نېکان ځي ورباندې څښتن د هغو لارښودنه کوي له هغه چا چې ډېر راضي وي څښتن ساتي هغوی

²⁴که هغوی وغورزیږي پورته به شي ځکه څښتن به هغوی ونیسي له لاسه ځنې

²⁵له ځوانۍ نه بیا تر اوسه چې زه زوړ یم ما هیڅکله نېکان خلک نه دي لیدلي چې څښتن وي دوی پرې ایښي یا یې کړی اولادونو وي ډوډۍ دپاره سوال

²⁶همېشه هغوی سخیان وي ورکوي نورو ته قرض اولادونه د هغوی ګرځي باعث د برکت

²⁷له بدۍ لیرې ګرځه کړه ته نېکي نو ته او ستا نسل به اوسي په دې خاوره کې تل

²⁸مینه څښتن کوي انصافه سره هغه نه خوشې کوي خپل وفادار خلک تر آبده هغوی ساتي خو نسلونه د بد کارو به تباه شي

²⁹نېکان به واک د ځمکې واخلي په کې اوسي به تل

³⁰د نیکو خلکو له خولې وزي د حکمت خبرې وي یې په ژبه د انصاف خبرې

³¹هغوی د خپل خدای قانون زړه کې ساتي ځکه یې پښې هیڅکله نه ښوییږي

³²په نېکانو پسې څار کړي بد کاران او کوښښ کوي د دوی د قتلولو

³³خو څښتن به دوی پرېنږدي چې دښمن ته په لاس ورشي یا محکوم په محکمه کې وګڼل شي

³⁴کوه توکل دې په څښتن باندې او په حکمونو یې عمل کوه ځمکه به درکړي تا به کړي سرلوړی د بد کارانو تباهي به ته په خپله ګورې

³⁵ما یو بدکاره او ظالم ولیده چې لوړ ولاړ ؤ لکه شنه ونه په خپله مورنۍ خاوره کې

³⁶خو چې وروسته تیریدم زه هغه نه ؤ هغه ځای کې ما هغه ولټاوه خو پیدا نشو

³⁷نیکو خلکو ته پام وکړه راستکارانو ته وګوره خوښوي چې کوم خلک سوله لري دوی به ښه راتلونکې

³⁸مګر ټول ګناهکاران به شي هلاک اولاده د شریرانو به تباه شي

³⁹څښتن ژغوري نېکان خلک د سختیو په شېبو کې یې څښتن وي پناه ځای

⁴⁰څښتن کاندي له هغو سره کومک او ورکوي ورته نجات ورکوي خلاصون هغوی ته له بد کارو ځکه دوی وروړي هغه لره پناه