Read Pashto (Nangahari) — د پښتو مقدس کتاب زبور 40 Bible Online

زبور 40 - Pashto (Nangahari) — د پښتو مقدس کتاب bible

زبور 40

¹په صبر ما انتظار وکړ د څښتن کومک ته بیا هغه راته غوږ کېښود او فریاد یې زما واورید

²زه یې د مرګ له کندې وویستلم زه یې له خټو او چکړو نه راوویستلم هغه زه ودرولم ګټ باندې او پښې زما یې کړلې ښې محکمې

³هغه زما په ژبه نوې نغمه راوستله زمونږ پاک خدای ته د ثناه سندره ډېر به یې وویني او وبه ډار شي توکل به وکړي په څښتن باندې

⁴هغه څوک دی بختور چې کړي توکل په څښتن څوک چې نه ګرځي په بتانو پسې نه کړي رجوع دې مغرورانو ته څوک چې د خدایانو درواغجنو عبادت کوي

⁵عجیبه ډېر کارونه تا دي مونږ ته کړي ای څښتنه زما خدایه هیڅوک نشته ستا په شان! زمونږ دپاره دې جوړ کړي عجیبه دي پلانونه دومره زیات د هغو شمېر دی! نه شم خبرې زه کولی د هغو په هکله

⁶نذرانې او قربانۍ دې نه غوښتلې نه دې اړتیا وه سوزېدونکو قربانو او نذرانو د ګناهونو ته خو تا راکړي دي غوږونه چې زه واورم ستا امرونه

⁷نو ما وویل: ‹حاضر یم او راغلی یم زما لپاره لیکل شوي ستا حکمونه په کتاب کې

⁸څنګه خوښیږي مې پوره چې ستا رضا کړمه ای زما خدایه دا ستا قانون زه په خپل زړه کې ساتم>

⁹څښتنه ستا د ټول قوم غونډه کې ما دا زیری ورکړ چې نجات راکوې ته پوهیږې زه به هیڅکله بند نکړم دا بیان

¹⁰ما په خپل زړه کې پټ ونه ساته ستا د نجات زیری ما همېش خلکو ته ویلي چې ته څومره وفادار یې وخپل قوم ته او کوې ورسره مرسته ستا د وفا او دوامداره محبت په هکله پاتې زه نه شومه خاموشه ستا د ټول قوم په غونډه کې زه

¹¹دا خپل رحمت دې په ما مه بندوه ای څښتنه ستا تلپاتې مینه او وفا دې همېشه زما ساتونکي وي

¹²حصار کړی بې حسابه تکلیفو یم رانیولی یمه خپلو ګناهونو د تیښتې لاره زه لیدلی نه شم هغه دي زیات زما د سر له ویښتو ما خپل همت بایللی

¹³مهرباني وکړه څښتنه ته مې خلاص کړه ته ژر راشه او کومک راسره وکړه

¹⁴هغوی چې هڅه کوي ما ووژني هغوی دې ماتې مکملې سره مخ شي وار خطا دې شي په کړاوو چې خوشحالي کړي زما هغوی دې تیښتې سره مخ شي او رسوا دې شي

¹⁵څوک چې په ما باندې ملنډې وهي له خپلې ماتې دې دوی وبوګنیږي

¹⁶ټول چې ستا لټون کوي شي خوښ دې خوشحالي دې کړي له تا نه هغه چې کړي مینه ستا خلاصون سره وایي دې تل وایي دې: ‹څومره دی عظیم څښتن>

¹⁷زه غریب یم او محتاج هم یمه ای څښتنه خو زه پاتې په نظر کې یمه ستا ته مې مدد ګار او خلاصوونکی یې بیړه وکړه او کومک لره مې راشه زما خدایه!