Read Pashto (Nangahari) — د پښتو مقدس کتاب زبور 49 Bible Online

زبور 49 - Pashto (Nangahari) — د پښتو مقدس کتاب bible

زبور 49

¹اے قومونو تاسو ټول دا واورئ، څوک چې په دنيا کښې اوسیږئ ما ته غوږ ونیسئ،

²خاصو او عامو، مالدارو او غريبانو واورئ،

³زما ژبه په حِکمت سره خبرې بيانوی، او د زړهٔ بيان مې خلقو ته پوهه ورکوی.

⁴زۀ به متلونو ته خپل غوږ ونيسمه، د رباب په ساز کښې به زهٔ د راز وينا وکړمه،

⁵نو زۀ به ولې يرېږمه کۀ سخته په ما راشی، کله چې د دوکه مارو په شرارتونو کښې راګير شم.

⁶دوئ چې په خپل مال دولت باندې يقين لری، او په خپل ډېر مال دولت فخر کوی.

⁷هیڅوک د چا د ژوند قیمت ورکولے نهٔ شی، او نۀ خُدائ پاک له د هغهٔ د سر کفاره ورکولے شی.

⁸د ژوندون قيمت بې بها دے، د ژوندون دپاره هیڅ قیمت پوره نهٔ دے.

⁹چې هغه دې تر ابده ژوندې پاتې شی، او هیڅکله دې قبر ته لاړ نۀ شی.

¹⁰نو ټول خلق به ووینى چې پوهان هم مړهٔ کيږی، جاهلان او بیوقوفان به يو ځائ هلاک شی. او د ټولو نه به مال دولت نورو ته پاتې شی

¹¹قبر د هغوئ ابدى کور دے، چرته چې به هغوئ د تل دپاره وی، کۀ څهٔ هم چې هغوئ جائيدادونه په خپل نوم خيژولى دی.

¹²خو اِنسانان د خپل دولت په وجه ژوندی پاتې کېدے نۀ شی، او هغوئ به لکه د ځناور په شان مړۀ شی.

¹³دا د هغوئ نصيب دے څوک چې په خپل ځان توکل کوی، او څوک چې د دوئ په لاره روان وی.

¹⁴د ګډو د رمې په شان هسې به د مرګ کندې ته ګذار شی، چرته چې مرګ به د دوئ شپون وی. په سحر کښې به نيکان په دوئ حکومت کوی، د دوئ بدن به په قبر کښې ختم شی، او قبر به د دوئ کور شی.

¹⁵خو خُدائ پاک به ما ته د قبر نه خلاصُون راکړی، ځکه چې هغه به ضرور ما خپل ځان ته راکاږی.

¹⁶هيڅ کله مه خفه کیږه کۀ یو سړے مالداره کیږی، او د چا د کور شان او شوکت چې زياتېږی.

¹⁷ځکه چې کله هغه مړ شی د ځان سره به هیڅ څيز نهٔ وړی، د هغهٔ شان او شوکت به قبر ته د هغهٔ سره نهٔ ځی،

¹⁸کله چې هغه ژوندې وو خپل ځان يې بختور ګڼلو، خلقو یې صفتونه کول کله چې مالداره وو.

¹⁹خو د خپل پلار او نيکۀ په شان دوئ به آخر مړهٔ شی، نو کله به هم دوئ د ژوندون رڼا ونهٔ وینى.

²⁰هغه څوک چې ډیر مال او دولت لرى خو دے نهٔ پوهیږی چې دوئ به د ځناورو په شان ختمیږی.