Read Pashto (Nangahari) — د پښتو مقدس کتاب زبور 50 Bible Online

زبور 50 - Pashto (Nangahari) — د پښتو مقدس کتاب bible

زبور 50

¹قادر مطلق خُدائ، مالِک خُدائ د زمکې خلقو ته حُکم وکړو، او د مشرق نه تر مغرب پورې د زمکې خلق يې راوغوښتل.

²د صيون نه چې په ښائست باندې پوره دے نو خُدائ پاک د هغه ځائ نه ځلیدلے دے

³زمونږ خُدائ به راشی او خاموشه به نۀ وی سوزیدونکے اور به ترې نه مخکښې او سخت طوفان به ترې چاپیره وی

⁴هغه به زمکه او پاس آسمانونه ګواهئ دپاره راوغواړى تر څو د خپل قوم عدالت وکړی:

⁵”زما ټول نيکان ماته راغونډ کړئ چا چې ما سره د قربانۍ په ذریعه تړون کړے دے.“

⁶آسمانونه د هغهٔ د صداقت اعلان کوی ځکه چې په خپله خُدائ قاضی فیصله کوی.

⁷”اے زما خلقو ماته غوږ شئ زهٔ به تاسو ته خبرې وکړم اے بنی اِسرائيلو زهٔ ستاسو په خلاف دا ګواهى کوم. چې هم زهٔ خُدائ یم او ستاسو خُدائ پاک یم،

⁸ستاسو د قربانیانو په وجه زهٔ تاسو نهٔ رټم، او ستاسو مسلسل سوزېدونکې قربانیانې زما په وړاندې دی

⁹ستاسو د غوجل غویې ته زما ضرورت نشته او نۀ مې حاجت شته ستاسو د شپول یو چیلى ته

¹⁰ولې چې د ځنګلونو ټول او هر یو ځناور زما دی، او په زرګونو غرونو کښې د څارو رمې زما دی.

¹¹زۀ د غرونو هر يو مارغۀ نه خبر یم، او د هوارو ټول مخلوق زما دی.

¹²کۀ چرے زۀ اوږے شوے وم خو بيا هم به مې وئیلی نهٔ وُو تا ته، ځکه چې دنيا او څۀ چې په کښې دی هغه ټول زما دی.

¹³ولې زۀ څۀ د غوايانو غوښې خورم؟ او يا زهٔ د چیلو وينې څښم؟

¹⁴ستاسو قربانئ خُدائ ته شکر ګذاری کول دی، او دا ستاسو د خُدائ تعالىٰ سره کړې وعدې او نذرانې پوره کوی،

¹⁵په وخت د مصيبت کښې ما ته آواز راکړئ، زۀ به تاسو د مصيبت نه بچ کړمه او تاسو به زما عزت وکړئ.“

¹⁶خو بدعمله ته خُدائ پاک ووئیل: ”تاسو ولې زما قانون بيانوئ، او زما د تړون خبرې په خپله ژبه کوئ؟

¹⁷تاسو د اصلاح نه نفرت کوئ او تاسو زما حُکمونه شاته غورزوئ.

¹⁸کله چې غل ووينئ نو تاسو ورسره مل شئ، تاسو ملګرتيا د زناکارو کوئ.

¹⁹هر وخت مو ژبه د بدۍ نه ډکه وی، تۀ په خپله ژبه د دروغو خبرې کوى.

²⁰هر وختِ تاسو د خپل ورور خلاف خبرې کوئ، د خپلې مور د بچى تاسو هر ځائ کښې غیبت کوئ.

²¹ستا په دې کارونو زۀ چپ پاتې شوم، زۀ دې هم د خپل ځان په شان وګڼلم. خو زهٔ دې اوس رټمه او په تا الزام لګوم،

²²ما ته غوږ شئ چا چې زۀ هير کړے يم هغوئ ټول دې توبه ګار شی، زۀ به مو ټوټې کړم او هيڅ څوک به نهٔ وی چې ستاسو مددګار شی.

²³څوک هم چې د شکر ګذارئ قربانی کوی نو زما احترام کوی. څوک چې هم په صحیح لار راون وی، نو زهٔ به ورته د خُدائ خلاصُون څرګند کړم.“