Read Pashto (Nangahari) — د پښتو مقدس کتاب زبور 51 Bible Online

زبور 51 - Pashto (Nangahari) — د پښتو مقدس کتاب bible

زبور 51

¹د خپل رحم په مطابق دې په ما مهربان شه خُدايه، او د خپلې ازلې مينې په وجه دې په ما رحم وکړه، د خپل لوئ رحم په مطابق دې زما ګناهونه ختم کړه.

²ټول ګناهونه زما ووینځه، او د ګناه نه مې پاک او صفا کړه.

³زۀ په خپل شرارت باندې پوهه يم، زۀ په خپلو بدو ټول عمر فکرمند يم.

⁴ستا او یواځې ستا خلاف مې ګناه کړې ده زۀ ګناه ګار يم، ما هغه کار کړے دے کوم چې ستا په نظر کښې بد دے. نو ستا فیصله زما په حقله د اِنصاف ده، او ستا عدالت زما په حق کښې ټيک دے.

⁵ګوره، زهٔ د ازل نه بدعمله يم، د مور د ګيډې نه زهٔ بلکل ګناه ګار يم.

⁶نو چې اخلاص او صداقت رانه غواړې، نو تهٔ په خپله زما زړهٔ ته پوهه راکړه.

⁷تهٔ زما ګناه ووینځه نو زۀ به صفا شم، تهٔ مې ووینځه نو زهٔ به هم د واورې نه زیات سپین شم.

⁸ما ته د خندا او خوشحالئ خبرې وکړه، کوم هډُوکی چې تا ما ته مات کړى وُو اوس دې خوشحالى وکړی.

⁹زما د ګناهونو نه مخ واړوه، زما بدۍ ټولې صفا کړه.

¹⁰پاکه خُدایه صفا زړهٔ ما له راکړه، په ما کښې تازه او وفادار روح واچوه.

¹¹ما تۀ د خپل حضُور نه مه شړه، خپل مقدس روح زما نه مۀ بوځه.

¹²ستا د خلاصُون خوشحالى بيا يو وارې راکړه. او زما روح ستا تابعدارئ ته مايل کړه.

¹³نو زۀ به نافرمانو ته وښایم ستا حُکمونه، نو ګناه ګار به یو ځل بیا تا ته راوګرځی.

¹⁴اے خُدايه، ما د وینې تویولو د جرم نه معاف کړه، نو بیا به زهٔ په خوشحالئ سره ستا د معافئ سرود بيان کړم.

¹⁵اے مالِکه خُدايه زما شونډې خلاصې کړه، او زهٔ به په خپله خولهٔ ستا ثناء صِفت وکړم.

¹⁶چې زۀ يې تا ته وړاندې کړم تۀ قربانى نۀ غواړې، او نۀ په سوزیدونکو قربانو تۀ خوشحالیږې.

¹⁷پاکه خُدايه تا ته د عاجز او مات روحونو خوښه ده قربانى، تهٔ غمژن او توبه ګار زړهٔ سپک نهٔ ګڼې.

¹⁸پاکه خُدايه د صيون ښار مدد وکړه مهربان شه، د یروشلیم دیوالونه جوړ کړه.

¹⁹نو هلته به تا ته رښتینې قربانئ پیش شی او ټولې سوزيدونکې نذرانې چې تهٔ پرې خوشحاله شې، او ستا په قربان ګاه باندې به غوايان تا ته وړاندې شی.