Read Pashto (Nangahari) — د پښتو مقدس کتاب زبور 58 Bible Online

زبور 58 - Pashto (Nangahari) — د پښتو مقدس کتاب bible

زبور 58

¹بادشاهانو تاسو کله هم په رښتيا ښې فیصلې کړى دی څهٔ؟ تاسو د خلقو عدالت په اِنصاف کوئ څهٔ؟

²نه بلکه تاسو په زړونو کښې د بې اِنصافئ منصُوبې جوړوئ، او تاسو په دنيا کښې شرارت خوروئ.

³د پیدا کيدو نه وړاندې شريران خو بې لارې دی، او د مور نه دروغجن پیدا شوی دی.

⁴دوئ لکه د مار په شان زهریله خبرې کوی، دوئ لکه د کُوڼ کوبرا په شان غوږونه په ځان رااړولی دی،

⁵د پاړو د شپیلئ آواز نهٔ اوری، کۀ هر څومره پاړو ښۀ شپیلئ ورته غږوی.

⁶د دوئ غاښونه مات کړه، پاکه خُدايه، د دې زمرو ژامنې ماتې کړه، مالِکه خُدايه.

⁷لکه په خُشکه زمکه کښې چې اوبۀ ورکیږی دغه شان دې دوئ ورک شی، او کله چې هغوئ ليندې راکاږی د دوئ غشی دې په خپله مات شی.

⁸هغوئ دې لکه د ګوجى په شان په خپله ویلی شی، لکه څنګه چې مړ ماشوم رڼا لیدلې نهٔ وی دوئ دې داسې شی.

⁹خُدائ به ډیر زر ورله واړۀ زاړۀ ټول ختم کړی، لکه د ازغو اور چې د لوښې د ګرمیدو نه وړاندې ختم شی.

¹⁰صادِقان به خوشحاله شى کله چې دوئ انتقام وګوری، نو خپلې خپې به د شريرانو په وینو کښې ووينځی.

¹¹او خلق به دا ووائی، ”بې شکه چې صادِقان به خپل اجر ومومی، بې شکه چې یو داسې خُدائ شته چې د دنيا اِنصاف کوی.“