Read Pashto (Nangahari) — د پښتو مقدس کتاب زبور 60 Bible Online

زبور 60 - Pashto (Nangahari) — د پښتو مقدس کتاب bible

زبور 60

¹تا مونږ رد کړُو او زمونږ ديوالونه دې راوغورزول اے خُدایه. مونږ ته په قهر شوے وې خو دوباره خپل مقام واپس راکړه.

²تا په زمکه زلزله راوستله او هغه وشليدله، ځکه چې ټوله ښوزیږی چودونه يې بند کړه.

³تا خپلو خلقو ته ډیرې سختې ښودلى دی، شراب دې مونږ ته راکړل او ډغرې مو وخوړلې.

⁴تا د هغوئ دپاره جنډه اوچته کړه څوک چې تا نه یریږی، چې دا به د حملې خلاف د پناه نښه وی.

⁵په خپل ښې لاس دې مونږ سره مدد وکړه او مونږ بچ کړه، چې د چا سره چې تهٔ مینه کوې هغوئ ته خلاصُون ورکړه.

⁶د خپل مقدس ځای نه خُدائ داسې وفرمائيل: ”د فتحې په خوشحالۍ کښې به زۀ شکیم تقسيم کړم، او د سکات د درې ناپ تول به وکړم.

⁷جِلعاد او منسه دواړه زما دی. اِفرائيم زما ټوپۍ او يهودیه زما د بادشاهئ کونټۍ ده.

⁸موآب زما د وينځلو ښانک دے او هغه به زما خدمتګار وی. او زهٔ په ادوم باندې خپلې څپلئ پاکومه او زهٔ به په فلسطين باندې د کامیابئ چغه وهم.“

⁹خو څوک به ما د قلعې پوخ ښار ته داخل کړی؟ څوک به ما ادوم ته ورسوی؟

¹⁰اے خُدايه، تا مونږه رد کړى يُو څهٔ؟ تۀ به نور زمونږ لښکرو سره په لار نۀ ځې څهٔ.

¹¹د دشمن خلاف زمونږ مدد وکړه، ځکه چې د اِنسانانو مدد بې فائدې دے.

¹²د خُدائ مدد به مونږ له کاميابی راکړی، هغه به زمونږ دشمنان د خپو لاندې کړی.