Read Pashto (Nangahari) — د پښتو مقدس کتاب زبور 64 Bible Online

زبور 64 - Pashto (Nangahari) — د پښتو مقدس کتاب bible

زبور 64

¹اے پاکه خُدایه، زما آواز تهٔ واوره، زما ژوند د دشمنانو د يرې نه وساته.

²ما د بدعمله د پټو منصُوبو نه په امان کړه، ما د بدکردارو د ډلې نه په امان کړه.

³خپلې ژبې يې لکه د تُورو په شان تیرې کړې دی، او د هغوئ بدې او ترخې خبرې لکه وژونکو غشو په شان دی،

⁴هغوئ د پټ ځائ نه په بې ګناه کس ګذارونه کوی. دوئ د چا نه نۀ يریږى ناڅاپه پرې ګوزارونه کوی.

⁵په بدو منصُوبو کښې دوئ د يو بل ډاډګېرنه کوی. او په خپلو کښې په مشوره سره پټ دامونه ږدی، په خپلو کښې دا خيال کوی چې څوک به مونږ وګوری؟

⁶دوئ په بې اِنصافئ سره منصُوبې جوړوی، او دوئ وائى چې، ”مونږ ډيره ښۀ منصُوبه جوړه کړُو.“ د اِنسان عقل او زړهٔ دواړه څومره چالاکه دی.

⁷خو خُدائ پاک به دوئ په غشو باندې ولی، او ناګهانه به دوئ زخمی کړی.

⁸د دوئ خپلې ژبې به هم دوئ تباه کوی. هر هغه څوک چې دوئ ته ګوری نو په سپکه به خپل سرونه هغوئ پورې خوزوی،

⁹او ټول اِنسانان به وویریږی. دوئ به د خُدائ پاک د شان کارونه بيان کړی، او د هغهٔ په کارونو به فکر کوی.

¹⁰ټول صادِقان دې د مالِک خُدائ خوشحالى وکړی او په هغهٔ کښې دې پناه واخلی. او ټول نيکان دې د خُدائ پاک ثنا صفت ادا کړی.