Read Pashto (Nangahari) — د پښتو مقدس کتاب زبور 66 Bible Online

زبور 66 - Pashto (Nangahari) — د پښتو مقدس کتاب bible

زبور 66

¹اے د ټولې دنيا خلقو خوشحالى وکړئ. خُدائ پاک ته د خوشحالۍ نارې ووهئ.

²د هغۀ د نوم د جلال سندرې ووايئ، او د هغهٔ جلالی حمد‌و‌ثناء بيان کړئ.

³خُدائ پاک ته ووايئ، ”ستا کارونه هیبتناک دی او زور طاقت دې ډیر لوئ دے. نو ځکه ستا ټولو دشمنانو ستا په وړاندې خپل سرونه ټیټ کړى دی.

⁴په ټوله دنيا کښې هر يو کس ستا عبادت کوی ستا حمد‌و‌ثناء وايى او ستا د نوم ثناء صِفت کوی.“

⁵خُدائ پاک چې څۀ کړې دی راشئ هغه وګورئ، او هغۀ چې بنيادمو له کوم لوئ کارونه کړی دی هغه وګورئ.

⁶هغۀ سمندر په وُچه زمکه باندې بدل کړو، نو هغوئ ښۀ خوشحالی وکړه کله چې پيدل په کښې تير شول.

⁷هغه د تل دپاره په خپل طاقت بادشاهى کوی، او قومونه د خپل نظر لاندې ساتى چې دوئ خو د دهٔ خلاف سرکشى نۀ کوی.

⁸اے ټولو قومونو آواز پورته کړئ، زمونږ د خُدائ پاک ثناء صفت وکړئ،

⁹د هغهٔ په لاس کښې زمونږ ژوندون دے زمونږ خپې یې د تيندک خوړلو نه ساتلى دی.

¹⁰نو پاکه خُدايه تا خو مونږه آزمائيلى يُو، داسې لکه سپين زر دې په اور صفا کړی يُو.

¹¹مونږ دې په جال کښې راګیر کړلو، تا زمونږ ملا باندې دروند بار کيښودلو.

¹²تا زمونږ دشمنان زمونږ په سر باندې تيريدو ته پريښودل، او مونږ دې اور او سیلاب نه تیر کړُو، خو آخر دې هم مونږ د آرام او برکتونو ځائ ته راوستُو.

¹³زۀ به سوزېدونکې قربانۍ ستا کور ته راوړم، خپلې کړې وعدې به تا سره پوره کړم،

¹⁴څۀ چې ما منلى وو هم هغه څيز به وکړم کوم وخت کښې چې زۀ سخته کښې ګېر وم.

¹⁵زۀ به په قربان ګاه باندې څربه څاروی پیش کړم، او دې سره به غویان او چېلۍ هم قربانى کړم.

¹⁶ما ته راشئ او غوږ ونیسئ تاسو ټول څوک چې د خُدائ پاک نه یریږئ، نو تاسو ته به زهٔ اوس ووایم چې هغهٔ ما له څهٔ کړی دى.

¹⁷په خپله خولهٔ ما هغهٔ ته سوال زاری وکړه او زما ژبې د هغهٔ ثناء صفت بيان کړو.

¹⁸کۀ زما په زړۀ کښې د ګناه دپاره ځائ وو، نو مالِک خُدائ به زما سوال اوریدلے نهٔ وو.

¹⁹خو بې شکه خُدائ پاک ما ته غوږ نیولے دے، او هغهٔ زما د دعا آواز اوریدلے دے.

²⁰ثناء صفت دې هغه خُدائ پاک ته وى چا چې زما دعا رد نهٔ کړه، هغهٔ خپله ابدى مینه ما سره ختمه نهٔ کړه،