Read Pashto (Nangahari) — د پښتو مقدس کتاب زبور 68 Bible Online

زبور 68 - Pashto (Nangahari) — د پښتو مقدس کتاب bible

زبور 68

¹پاکه خُدایه راپاڅه، او خپل دشمنان دې خوارهٔ وارهٔ کړه، څوک چې تا نه نفرت کوی هغوئ تالا والا کړه.

²لکه څنګه چې لوګې د هوا په وړاندې ځغلی، دغه شان تاسو دوئ د خپل ځان نه وځغلوئ. لکه څنګه چې موم د اور په مخکښې ويلې کیږی، دغه شان دې بدکاره خلق د خُدائ پاک په وړاندې تباه کیږی.

³خو صادِقان دې د هغهٔ په وړاندې خوشحالى وکړی، د خُدائ پاک په حضُور کښې دې خوشحاله شی، او د خوښۍ نارې دې وکړی.

⁴خُدائ پاک ته سرود ووایئ، او د هغهٔ د نوم ثناء صفت بيان کړئ، څوک چې سور په وريځو راځى هغه دروند کړئ، د هغهٔ نوم مالِک خُدائ دے او د هغهٔ په وړاندې خوشحالی وکړئ،

⁵د یتیمانو دپاره پلار دے او د کُنډو حفاظت کوی، هم دا خُدائ پاک دے څوک چې په خپل مقدس ځائ کښې سکونت کوی.

⁶بې کسه تۀ خاندان او قيدى ته خوشحالى او آزادى ورکوی. خو سرکشه خلق په وچو او سوکړُو کښې ژوند کوی.

⁷اے پاکه خُدایه، کله چې تهٔ د خپلو خلقو لارښود وې، او په بیابان کښې د هغوئ په وړاندې روان وې،

⁸زمکه وښوزېدله او باران د بره آسمانه وورېدو د خُدائ پاک په وړاندې، د سینا په صحرا کښې او د بنی اسرا‎ئیل د خُدائ پاک په وړاندې.

⁹په شیبو شیبو باران دې راشروع کړو پاکه خُدایه. ترڅو تهٔ خُشکه زمکه کړې تازه او آباده،

¹⁰ستا غوره شوی خلق په هغه ځائ کښې اوسيدل. پاکه خُدایه، تا مسکینان د خپل سخاوت په وجه ماړۀ کړل.

¹¹مالِک خُدائ حُکم وکړو، او ډيرو ګڼو ښځو دا زیرے ورسولو:

¹²”بادشاهان سره د فوجه وتښتيدل!“ په کور کښې ښځو د غنیمت مالونه تقسیم کړل.

¹³هغوئ خزانې وموندلې کۀ څهٔ هم څوک چې شپول کښې اوسيدل، کونترې چې د سپینو زرو وزرونه يې وُو او بڼې یې د سرو زرو وې.

¹⁴کله چې قادر مطلق خُدائ ټول بادشاهان خوارۀ وارۀ کړل، د واورې په شان په ضلمون غر ورېدل.

¹⁵باشان غرونه څومره اوچت دی، د باشان د غر ډیرې دنګې څوکې دی.

¹⁶اے لوړو غرونو تاسو ولې د حسد په نظر ګورئ، هغه غرونو ته کوم چې خُدائ د خپل ځان د اوسیدو دپاره منتخب کړی دی؟ چرته چې به مالِک خُدائ د تل دپاره اوسيږی.

¹⁷د مالِک خُدائ جنګی ګاډۍ دی په سل ګونو او زرګونو. مالِک خُدائ د سینا د غر نه خپل مقدس ځای ته راغلو.

¹⁸کله چې تهٔ بره لاړې قیدیان دې ځان سره بوتلل. د بنيادمو نه درته تحفې مِلاو شوې د هغوئ نه هم کومو چې بغاوت کړے وو. نو هم داسې رب خُدائ هلته استوګنه وکړله.

¹⁹زمونږ خلاصُونکې مالِک خُدائ ته دې ثناء وی، څوک چې هره ورځ زمونږ بوج وړی.

²⁰زمونږ قادرِ مطلق خُدائ هغه مالِک خُدائ دے څوک چې خلاصُون ورکوی، قادرِ مطلق خُدائ څوک چې مونږ د مرګ نه خلاصوی.

²¹خو مالِک خُدائ به د خپلو دشمنانو سر هوار کړی، او د هغوئ کوپړئ به هواره کړ‎ی څوک چې د ګناه په لار روان وی.

²²مالِک خُدائ ووئيل، ”زهٔ به خپل دشمنان د باشان نه واپس راښکته کړم، زۀ به هغوئ د سمندر د تل نه راوباسم،

²³تاسو به د هغوئ په وینو کښې خپلې خپې ووینځئ، او ستاسو سپی به خپله حصه په خپلو ژبو وڅټی.“

²⁴اے پاکه خُدایه، ستا جلوس هر چا ولیدلو، زما د خُدائ پاک او زما د بادشاه جلوس چې مقدس ځائ ته داخلیدو.

²⁵سندر غاړی ترې نه وړاندې او ورپسې موسيقاران دی، او په مينځ کښې يې پېغلې جينکئ دی چې تمبلونه غږوی:

²⁶”په لویو ډلو کښې د خُدائ پاک ثناء صفت ادا کړئ، د بنی اِسرائيلو په جماعت کښې د مالِک خُدائ صفت وکړئ.“

²⁷د بنيامین وړه قبیله د دوئ لارښونه کوی، بيا ورپسې د يهوداه شهزادګان راروان دی، په هغوئ پسې د زبولون او نفتالی شهزادګان راروان دی.

²⁸پاکه خُدایه، خپل زور د‎ې وښايه. لکه څنګه چې تا مخکښې ښودلے وو مونږ ته خپل زور بیا وښایه، پاکه خُدایه.

²⁹ستا د مقدس کور په خاطر چې په يروشليم کښې دے، بادشاهان تا له تحفې راوړی.

³⁰مصر ورټه څوک چې د وحشى ځناورو په شان د لوخو په ځنګل کښې اوسيږی، او هغه قومونه چې د ځنګلی غویانو د رمو په شان د سخو په مينځ کښې دی ورټه، او دوئ عاجزه کړه چې تا ته د سپینو زرو نذرانې وړاندې کړی. هغه خلق خوارهٔ وارهٔ کړه څوک چې د جنګ شوق کوی.

³¹مصریان دې د زیړو د قیمتی تحفو سره راشی، او د ايتهوپيا خلق دې خُدائ ته لاس په دعا شی.

³²د دنيا بادشاهتونو د خُدائ د لويئ سندرې ووايئ، مالِک خُدائ ته سندرې ووايئ او ثناء صفت بيان کړئ.

³³د هغهٔ ثناء صِفت وکړئ څوک چې په عرش باندې د ازل نه ناست دی، هغه چا ته څوک چې په دروند آواز غږیږی.

³⁴خُدائ پاک په خپل قدرت کښې وستايئ، د چا چې دبدبه په بنی اِسرائيلو او زور په آسمانونو دے.

³⁵په خپل مقدس ځائ کښې ستا شان څومره لوئ دے، پاکه خُدایه، د بنی اِسرائيلو خُدائ پاک طاقت او قدرت ورکوی خپلو خلقو ته، ثناء صفت دې وی خُدائ پاک ته.