Read Pashto (Nangahari) — د پښتو مقدس کتاب زبور 72 Bible Online

زبور 72 - Pashto (Nangahari) — د پښتو مقدس کتاب bible

زبور 72

¹اے خُدايه پاکه، د اِنصاف دپاره بادشاه له همت ورکړه، او د بادشاه زوئ له صداقت ورکړه.

²هغه به په صداقت سره د خلقو عدالت وکړی، ستا د مظلومانو به په اِنصاف سره عدالت وکړی.

³غرونه به خلقو ته آبادی راولی، غونډۍ دې د صداقت میوه ونيسی.

⁴او هغه به د خلقو په مينځ کښې د مظلومانو مدد وکړی، او د غريبانانو بچو ته به خلاصُون ورکړی، او ظالمان به د خپو لاندې کړی.

⁵تر څو چې په آسمان کښې نمر او سپوږمۍ وی، ټول خلق به تا نه یریږی. نسل در نسل به دا جاری وی.

⁶نو بادشاه دې د باران په شان د وښو په پټو راوریږی، لکه د باران په څاڅکو چې زمکه سیرابیږی.

⁷د هغهٔ په ورځو کښې به صادِقان آباد وی، تر څو چې په آسمان کښې سپوږمۍ وی نو تر هغه وخته به آباد وی.

⁸هغه به د سمندر نه تر سمندر پورې، او د فرات د سیند نه د زمکې تر آخره به حکومت کوی.

⁹د دشتو کوچیان به د هغۀ په وړاندې په سجده شی، د هغهٔ دشمنان به خاوری په خولهٔ شی.

¹⁰هغهٔ ته به د ترسيس بادشاهان او د لرو لرو جزیرو نه قلنګ راوړی، هغهٔ ته به د شيبا او سِيبا بادشاهان تحفې راوړی.

¹¹ټول بادشاهان به هغهٔ ته په سجده شی، ټول قومونه به د هغۀ خدمت ګذار شی.

¹²هغه به حاجتمندو ته خلاصُون ورکړی څوک چې هغهٔ ته وژاړی، او د هغه مظلومانو به مدد ګار وی د چا چې څوک نهٔ وی.

¹³په ضعیفانو او په حاجتمندانو به رحم وکړی، او حاجتمندان به د مرګ نه بچ کړی.

¹⁴هغه به دوئ د ظُلم او جبر نه بچ کړی، د هغهٔ په نظر کښې د دوئ وینه ده ډیره قیمتی.

¹⁵د بادشاه عمر دې ډیر شی د شیبا سرهٔ زر دې هغۀ ته ورکړے شی، خلق دې تل د هغهٔ دپاره دعا وغواړى، او ټوله ورځ دې هغهٔ ته د خُدائ پاک برکت ورکړے شی.

¹⁶غله دانه دې په ملک کښې ډېره تېره شی، تر دې چې د غرونو په سرونو دې غلې دانې وشی. د لبنان د میوو په شان دې میوه زیاته شی، لکه څنکه چې پټى د وښو نه شنهٔ دی، دغه شان دې اِنسانان په کښې ډير شی.

¹⁷د بادشاه نوم دې د تل دپاره پاتې شی، تر څو چې نمر وی تر هغې دې پاتې شی. ټول قومونه دې د هغۀ په وسیله برکتى شی، او هغوې دې ورته بختور ووائى،

¹⁸ثناء صفت دې مالِک خُدائ، د بنی اِسرائيلو خُدائ پاک ته وی، څوک چې په یواځې ځان په خپله عجيبه کارونه کوی.

¹⁹د هغهٔ جلالی نوم ته دې د تل دپاره ثناء صفت وی، ټوله زمکه دې د هغۀ د جلال نه ډکه وی. آمين ثُمه آمين.

²⁰دا د داود د دعاګانو خاتمه ده، څوک چې د يَسى زوئ دے.