Read Pashto (Nangahari) — د پښتو مقدس کتاب زبور 80 Bible Online

زبور 80 - Pashto (Nangahari) — د پښتو مقدس کتاب bible

زبور 80

¹اے د بنی اِسرائيلو شپونکيه، زمونږ سوال زاری واوره، تا چا چې د یوسف لکه د رمې هسې لارښوونه وکړه، تهٔ چې اے خُدايه پاکه پاس په تخت د وزرو والا مخلوق مينځ کښې ناست يې خپل جلال راښکاره کړه

²د اِفرائيم، بنيامين او د منشه په وړاندې خپل قدرت دې څرګند کړه. او زمونږ د خلاصُون دپاره راشه.

³پاکه خُدایه، مونږ دوباره په خپل حال کړه، د خپل مخ رڼا دې په مونږ وځلوه، چې تر څو مونږ خلاصُون حاصل کړُو.

⁴اے مالِکه خُدايه، رب الافواج خُدایه ستا غضب به په خپل قوم تر کومې پورې وی، او تهٔ به تر څو پورې د خپلو خلقو دعاګانې نۀ اورې؟

⁵تا د غم په خوراک دوئ ماړهٔ کړل، او د اوښکو ډک جام دې په دوئ باندې وڅښلو.

⁶تا مونږ د خپلو ګاونډیانو د خندا کړُو، او زمونږ د دشمنانو دې مونږ د مسخرو کړُو.

⁷رب الافواج خُدایه، مونږ دوباره په خپل حال کړه، د خپل مخ رڼا دې په مونږ وځلوه، چې تر څو مونږ خلاصُون حاصل کړُو.

⁸تا خپل قوم لکه د انګور د بوټی په شان د مصر نه راوړلو، او غیر قومونه دې وشړل او د هغوئ په ځای دې دوئ په خپل ملک کښې ولګول.

⁹تا د دې دپاره زمکه ښۀ تياره کړه، او جرړې يې وکړې او زمکه يې ډکه کړه.

¹⁰ټول غرونه د دې په سوری کښې پټ شول، او لوړ او قوی دیار او هم د انګور څانګې په کښې پټې شوې.

¹¹څانګې يې د سمندر پورې خورې شوې، او د فرات د سیند پورې يې ځېلۍ خورې شوې.

¹²تا ولې دېوالونه ورله راوغورزول، د دې دپاره چې څوک په لاره تیریږی انګور ترې راشوکوی؟

¹³ځنګلى خنزيران دا تباه کوی، او ځنګلی ځناور په کښې څران کوی.

¹⁴اے رب الافواج خُدایه، مونږ ته راوګرځه، د آسمان نه لاندې راوګوره، او خپل د انګور بوټے دې وګوره،

¹⁵هغه جرړه چې ستا ښې لاس لګولې ده، او هغه زوئ چې تا خپل ځان دپاره لوئې کړے دے.

¹⁶ستا د انګورو بوټے پرې کړے شوے دے، او اور ته غورزولے شوے دے. او په خپل قهر دې دا خلق تباه کړه.

¹⁷ستا ښې لاس دې ستا په ښې طرف خلقو باندې وی، د بنې آدم زوئ چې تا خپل ځان دپاره لوئ کړے دے.

¹⁸نو داسې به بیا مونږ کله هم تا نه وانۀ وړُو. مونږ ژوندى پرېږده چې ستا د نوم ثناء صِفت وکړُو.

¹⁹اے رب الافواج خُدایه، مونږ دوباره په خپل حال کړه، د خپل مخ رڼا دې په مونږ وځلوه، چې تر څو مونږ خلاصُون حاصل کړُو.