Read Pashto (Nangahari) — د پښتو مقدس کتاب زبور 83 Bible Online

زبور 83 - Pashto (Nangahari) — د پښتو مقدس کتاب bible

زبور 83

¹پاکه خُدایه چپ مه پاتې کیږه، پاکه خُدایه مه غلے کیږه مه چپ کیږه.

²وګوره ستا دشمنان راپاریدلى دی، او څوک چې تا نه نفرت کوی سرکشۍ سره راپاڅیدلی دی.

³ستا د قوم خلاف يې ارادې د چل نه ډکې دی، تهٔ چې چا سره مینه کوې د هغوئ خلاف منصُوبې جوړوې.

⁴دوئ وائی، ”راځئ چې د يو قوم غوندې يې تباه کړُو، چې د بنی اِسرائيلو نوم په دنيا کښې نور پاتې نهٔ شی.“

⁵په یو سوچ سره دوئ په شریکه منصُوبې جوړوی، دوئ ستا خلاف يو موټے شول او اتحاد جوړوی.

⁶په هغوئ کښې دا قومونه شریک وُو آدومیان او اِسماعیليان، موآب او هاجريان،

⁷جبل، عمون، عماليقيان، ورسره، صور او فلسطينيان.

⁸تر دې چې اسوريان ورسره هم یو ځائ شوى دی، او خپل طاقت يې د لوط اولاد سره رايو ځائ کړے دے.

⁹کوم کار دې چې د ميديانيانو سره کړے وو د دوئ سره يې هم وکړه، لکه څنګه چې تا د سیسرا او د جبین سره د قیسون دریاب په غاړه کړے وو،

¹⁰څوک چې په عیندور کښې تباه شول، او د دوئ د بدن نه د پټو ډیران جوړ شو.

¹¹د هغوئ مشران د عوريب او زئیب په شان مړهٔ کړه، او شهزادګان يې لکه د ضلمنع او د زبیح په شان مړهٔ کړه،

¹²دا په کښې چا ووئيل چې، ”راځئ چې د خُدائ پاک د څران ځايونه قبضه کړُو.“

¹³اے پاکه خُدايه زما، هغوئ لکه د خر بوټی په شان سپک کړه، او لکه د بوسو دوئ د باد په واړاندې والوځوه،

¹⁴لکه څنګه چې اور ځنګل سوزوی، او لکه شغلې چې غرونه لمبه کوی،

¹⁵نو په خپل زورَور باد سره دې هغوئ په مخه واخله، او هغوئ په خپل طوفان سره ویروه.

¹⁶تهٔ هغوئ په شرمونو وشرموه، نو مالِکه خُدایه، تر څو چې خلق ستا د نوم لټون وکړی.

¹⁷هغوئ دې د تل دپاره وشرمیږی چې ويریږی. او هغوئ دې د شرم په حالت کښې مړهٔ شی.

¹⁸تهٔ هغوئ په دې پوهه کړه چې هغه هم تهٔ یې د چا نوم چې مالِک خُدائ دے، او هم دا تهٔ یواځې په ټوله زمکه د ټولو نه اوچت خُدائ پاک يې.