Read Pashto (Nangahari) — د پښتو مقدس کتاب زبور 84 Bible Online

زبور 84 - Pashto (Nangahari) — د پښتو مقدس کتاب bible

زبور 84

¹ستا د اوسېدو ځائ څومره ښکلے دے، اے مالِکه ربُ الافواجه خُدایه.

²روح مې ليواله دے تر دې چې ناتوانه دے، د دې دپاره چې زهٔ د مالِک خُدائ دربار ته ننوځم. زما زړهٔ او زما ځان په چغه د ژوندی خُدائ ثناء صفت کوی.

³چنچڼې خو هم کور پیدا کړے دے، طوطاګرکى خو هم خپل ځان دپاره جاله جوړه کړې ده، ستا د قربانګاه سره نزدې چې خپل بچى په کښې لوئ کړی اے مالِکه خُدایه، رب الافواجه زما بادشاه او زما پاکه خُدایه.

⁴بختور دی هغوئ څوک چې ستا کور کښې اوسيږی، دوئ به مدام هلته ستا ثناء صِفت کوی.

⁵بختور دی هغوئ د چا طاقت چې په تا کښې دے، چا چې خپل زړونه د یروشلیم سفر پورې تړلی دی،

⁶کله چې دوئ د بکا وادۍ نه تېرېږی، دوئ ترې نه د چینو وادۍ جوړوی. د منې بارانونه په کښې د اوبو تالابونه جوړوی.

⁷د دوئ طاقت به په سفر کولو سره نور هم زیات شی، تر دې چې په صیون کښې د خُدائ پاک په وړاندې ودريږی.

⁸اے مالِکه رب الافواج خُدايه، سوال مې واوره، اے د يعقوب پاکه خُدايه، ما ته غوږ شه.

⁹زمونږ پاکه خُدایه، زمونږ په ډال نظر ساته، خپل غوره شوی ته په ښۀ نظر کاتۀ وکړه.

¹⁰ستا په دربار کښې یوه ورځ بهتره ده په تیریدو د بل ځای د زرو ورځو نه. زۀ د خُدائ پاک په کور کښې دربان ښۀ یم نۀ چې د شريرانو په خیمو کښې اوسیږم.

¹¹خو مالِک خُدائ زمونږ خُدائ پاک نمر او ډال دے. ځکه چې مالِک خُدائ به مونږ ته خپل فضل او عزت راکړی، هغه د هر هغه چا نه ښۀ څيزُونه نۀ ايساروی د کومو خلقو لارې چې بې داغه وی.

¹²اے مالِکه خُدايه، رب الافواج خُدایه، بختور دے هغه څوک چې په تا توکل کوی.