Read Pashto (Nangahari) — د پښتو مقدس کتاب زبور 86 Bible Online

زبور 86 - Pashto (Nangahari) — د پښتو مقدس کتاب bible

زبور 86

¹اے مالِکه خُدايه، سوال مې واوره، او قبول يې کړه، ځکه چې زهٔ غريب او حاجتمند يم.

²زما ژوندون وساته ځکه چې ما خپل ځان تا ته پیش کړے دے، هم تهٔ زما خُدائ پاک يې خپل خدمتګار دې بچ کړه چا چې په تا اعتماد کړے دے،

³په ما رحم وکړه، اے مالِکه خُدايه، ځکه چې زۀ ټوله ورځ تا ته زاری کوم،

⁴خپل خدمتګار ته دې خوشحالی ورکړه، ځکه چې ما خپل ځان تا ته وقف کړے دے.

⁵تۀ بخښونکے او ښهٔ يې مالِکه خُدایه، او څوک چې درنه سوال کوی تهٔ د هغوئ سره نهٔ ختمیدونکې مینه کوې.

⁶زما دعا واوره، اے مالِکه خُدايه، د رحم دپاره زما ژړا واوره.

⁷زما د تکلیف په ورځ به زهٔ تا ته آواز وکړم، نو تهٔ به جواب راکړې.

⁸اے مالِکه خُدایه، ستا نه غیر بل خُدائ نشته، ستا په شان کارونه څوک هم کولے نۀ شی.

⁹اے مالِکه خُدایه، ټول قومونه تا پیدا کړی دی، دوئ به راشی او ستا په وړاندې به عبادت وکړی. او دوئ به ستا نوم ته جلال ورکړی.

¹⁰تۀ لوئ یې او ښائسته کارونه کوې. يواځې هم تهٔ خُدائ پاک يې.

¹¹اے مالِکه خُدايه، ما ته خپله لار راوښايه، نو زۀ به ستا په حقيقت کښې وګرځم، مطمئن زړۀ ما له راکړه چې زۀ ستا عزت وکړم.

¹²اے مالِکه، زما پاکه خُدايه، په خپل ټول زړهٔ سره به ستا ثناء ادا کړم، زهٔ به ستا نوم له د تل دپاره جلال ورکړم.

¹³ځکه چې زما دپاره ستا مینه ډیره ده، تا زهٔ د قبر د کندې نه بچ کړم.

¹⁴اے پاکه خُدايه، مغروران په ما باندې حملې کوی، د ظالِمانو يوه ډله زما ژوند پسې ګرځی، هغه خلق څوک چې ستا عزت نهٔ کوی.

¹⁵خو تهٔ، اے مالِکه خُدايه، رحيم او مهربانه يې. په غصه کښې تېزى نۀ کوې او د ډېرې مينې او وفادارۍ نه کار اخلې.

¹⁶ما ته راوګرځه او په ما باندې رحم وکړه، خپل خِدمت کوُونکى له طاقت ورکړه، د خپلې وينځې زوئ بچ کړه.

¹⁷ما ته نښه راوښایه ستا د ښۀ والى، نو چې زما دشمنان دا وګورى نو وبه شرمیږی، ځکه چې اے مالِکه خُدايه، تا زما مدد وکړو. او ما له دې تسلى راکړه.