Read Pashto (Nangahari) — د پښتو مقدس کتاب زبور 88 Bible Online

زبور 88 - Pashto (Nangahari) — د پښتو مقدس کتاب bible

زبور 88

¹اے مالِکه خُدايه، زما خلاصُونکې پاکه خُدایه، شپه او ورځ ستا په وړاندې ژړا کوم.

²زما دعا دې تا ته درورسیږی، زما ژړا ته غوږ ونیسه.

³زما ځان د تکلیفونو نه ډک دے، زما ژوند مرګ ته نزدې شوے دے.

⁴خلق زما په حقله وايى چې خپې يې په قبر کښې دی. او د یو بې وسه کس په شان شوے یم.

⁵زۀ په مړو کښې حِساب شوے يم، زۀ لکه د مړو په شان شوے يمه چې په قبر کښې پراتۀ وی، څوک چې به تهٔ نور نهٔ یادوې، څوک چې ستا د نظر نه اخوا شوے وی.

⁶زۀ دې د قبر کندې ته غورزولے يم، تا زهٔ تور تیارو ته غورزولے یم.

⁷ستا غضب په ما بار شوے دے، او ستا ټولو چپو زۀ رالاندې کړے يم.

⁸تا زما دوستان ما نه لرې کړی دی، زهٔ دې د هغوئ دپاره کرکژن وګرځولم. ګېر يمه زۀ چرته تښتېدلے نۀ شم.

⁹زما د ډېره غمه نظر کم شولو. هره ورځ تا ته زاری کوم مالِکه خُدایه، او خپل لاس تا ته د دعا دپاره اُوچتوم.

¹⁰تهٔ د مړو دپاره معجزې کوې څهٔ؟ څوک چې مړهٔ دی دوئ پاڅیدے شی چې ستا ثناء صفت وکړى څهٔ؟

¹¹ولې ستا د ابدى مينې بيان قبر کښې کېدے شى څۀ، يا ستا د وفادارۍ بيان په قبر کښې کېدے شى څۀ؟

¹²ولې په تیارهٔ کښې ستا معجزې پېژندے شى څۀ، يا د فنا په ملک کښې ستا رښتینوالے څوک پېژندے شى څۀ؟

¹³خو زهٔ مالِکه خُدایه د مدد دپاره تا ته ژړا کوم، زهٔ به هر سحر تا ته سوال زاری کوم.

¹⁴ولې مالِکه خُدایه تا زهٔ رد کړے یم، او ولې تهٔ خپل مخ ما نه اړوې څهٔ؟

¹⁵زهٔ د ځوانئ نه کړیدلے او مرګ ته رانزدې شوے یم. ما ستا یره تیره کړله او پریشانه شوے یم.

¹⁶ستا قهر په ما باندې راپرېوتے دے، زۀ ستا د يرې نه تباه شوے يم.

¹⁷ټوله ورځ لکه د سیلاب په شان رانه راتاو وی، په پوره توګه هغهٔ زهٔ راګېر کړے يم.

¹⁸تا زما محبوب او دوستان رانه جدا کړى دی، تورې تیارو سره مې يارانه شوه.