Read Pashto (Nangahari) — د پښتو مقدس کتاب زبور 9 Bible Online

زبور 9 - Pashto (Nangahari) — د پښتو مقدس کتاب bible

زبور 9

¹زه به وایم ثناه ستا د زړه له کومي ای څښتنه بیانوم به ټول کارونه عجیبه چې کړي تا

²زه به وایمه سندرې د خوښۍ ستا له سببه زه به وایمه سندرې او صفت به ستا کومه خدای تعالیٰ

³دښمنان زما چې مخ شي تا سره تښتي وهي دوی تیندکونه هلاکیږي

⁴تا زما په حق کې وکړه فیصله ته عادل یې ته صادق یې قضاوت کې

⁵تا محکوم کړل بې دینان، تا نابود کړل بدکاران تا د دوی نومونه ورک کړل تر آبده

⁶ختم شوي تل دپاره دي زمونږه دښمنان تا کړل وران د دوی ښارونه تر آبده دوی به بیا نه شي هیڅ وخت د چا په یاد

⁷خو څښتن دی تل ترتله په تخت ناست ده خپل تخت دی تیار کړی قضاوت ته

⁸او حکومت کړي په راستۍ په دې جهان په انصاف کړي د قومونو قضاوت

⁹خداوند د مظلومانو پناه ځای دی د سختیو په شېبو کې امن ځای دی

¹⁰هغه خلک چې تا پیژني څښتنه کړي په تا به توکل بې له پوښتنه ځکه ته مخ نه اړوې د هغو چې راځي تاته

¹¹د ثناه سندرې ووائئ څښتن ته چې صیهون کې پاچاهي کړي څه چې هغه کړي دي بیان یې کړئ قومونو ته

¹²اخلي بدل د قاتلانو ځنې او مظلومان یې هم په یاد کې وي فریاد د هغو هېرولای نه شي

¹³ای څښتنه رحم وکړه په ما باندې دښمنان زما، ما څومره ځوروي ورته وګوره ای څښتنه ته د مرګ د خولې ما خلاص کړه

¹⁴نو به ستا ټول صفتونه بیانومه د صیهون په دروازه کې زه به هلته یم خوشحاله ځکه تا به یم ژغورلی

¹⁵هغه کنده چې قومونو وه ایستلې په کې خپله ولویدل هغه دام چې دوی ؤ ایښی په کې خپله ونښتل

¹⁶مشهور شوی دی څښتن په خپل انصاف بدکاران په خپلو بدو عملونو کې ګېر شوي

¹⁷ګور د ټولو بدکارانو سرنوشت دی هم د هغو چې هېر کړی یې پاک خدای دی

¹⁸ځکه محتاجان به تر آبده نه هیریږي نه امید به د خوارانو تر آبده بربادیږي

¹⁹ای څښتنه انسان مه پرېږده چې ستا په محکمه کې شي برلاسی کړه قومونه ته حاضر وخپل حضور ته ته هغوی محاکمه کړه

²⁰ترهه واچوه په دوی کې ای څښتنه ترڅو پوه شي چې دوی محض انسانان دي