Read Pashto (Nangahari) — د پښتو مقدس کتاب زبور 90 Bible Online

زبور 90 - Pashto (Nangahari) — د پښتو مقدس کتاب bible

زبور 90

¹اے مالِکه او پاکه خُدايه، تهٔ همیشه زمونږ د اوسیدو ځائ يې، نسل در نسله پورې يې.

²د دې نه مخکښې چې لا دې غرونه ‎پیدا کړی نهٔ وُو او نۀ دې لا زمکه او دنيا پیدا کړې وه، تهٔ خُدائ پاک يې د ازل نه تر ابده.

³تهٔ بيا بنيادم د خاورو سره خاورې کړې، ورته ووائې چې، ”اے فانى اِنسانه واپس خاورې شه.“

⁴ځکه ستا په نظر کښې زر کاله داسې دی لکه یوه ورځ چې تېره شوی وی، او یا د شپې یو پار چې تیر شوے وی.

⁵تهٔ اِنسان د مرګ په خوب اودهٔ کوې. او دوئ لکه د تازه ګياه په شان په سحر کښې راټوکېږی،

⁶په سحر کښې راټُوکېږى او تازه وی، په ماښام کښې مړاوې شى او اوچ شی.

⁷ستا غصې مونږ ختم کړی یُو، او مونږ ستا قهر وارخطا کړی يُو.

⁸زمونږ ګناهونه دې په خپل مخکښې ايښى دی، زمونږ پټې خطاګانې تا ته ښکاره دی.

⁹زمونږ ژوند ستا په قهر کښې تېر شو، زمونږ ژوند په اهونو کښې ختم شو.

¹⁰زمونږ د ژوند موده اويا کاله وی، او کۀ مونږ طاقت ولرو نو اتيا کاله به وی. خو دا ټول په خفګان او تکلیفونو تیرَوو. او دا زر تیریږی او مونږ ترې نه فنا کیږُو.

¹¹ستا د غصې زور چا ته معلوم دے؟ ځکه چې ستا غصه دومره لویه ده څومره چې ستا نه یره پکار ده.

¹²تهٔ مونږ د خپل ژوند د لنډوالى نه خبر کړه، تر څو چې مونږ په عقلمندی سره ژوند وکړُو.

¹³اے مالِکه خُدايه، راشه، دا به ترڅو پورې وی؟ په خپل خدمتګارانو باندې رحم وکړه.

¹⁴مونږ دې په خپله ابدی مینه باندې په سحر کښې ماړۀ کړه، ترڅو چې مونږ د خوشحالۍ سندرې ووایُو او ټول عمر خوشحاله شو.

¹⁵څومره چې په مونږ سخته وه مونږ ته دومره خوشحالی راکړه، چې څومره عمر زمونږ په غم وو دومره خوشحالی راکړه.

¹⁶ستا ټول کارونه دې ستا خدمتګارانو ته ښکاره شی، ستا جلال دې پاکه خُدايه د دوئ بچو ته ښکاره شی.

¹⁷اے مالِکه خُدايه، پاکه خُدايه، ستا جلال دې په مونږ رانازل شی، زمونږ د لاسونو کارونه مونږ ته مضبوط کړه او زمونږ د لاسونو کارونو ته کامیابى ورکړه.