Read Pashto (Nangahari) — د پښتو مقدس کتاب زبور 91 Bible Online

زبور 91 - Pashto (Nangahari) — د پښتو مقدس کتاب bible

زبور 91

¹هغه څوک چې د خُدائ تعالىٰ په پناه کښې اوسيږی، هغه به د قادر مطلق خُدائ د سوری لاندې په امان وی.

²زۀ به دا شان وايم چې، ”مالِک خُدائ زما پناه او هم زما قلعه ده، هم هغه زما خُدائ پاک دے په چا چې توکل کوم.“

³بې شکه هغه به تاسو د ښکاریانو د دامونو نه خلاص کړی او هغه به تاسو د سختو بیماریانو نه بچ کړی.

⁴په خپلو بڼو به دې پټ کړی او تهٔ به د هغهٔ د وزرونو لاندې پناه ومومې. د هغۀ وفادارى به دې ډال او ستا د حفاظت دیوال وی.

⁵تۀ به د شپې د دهشت نه نۀ يرېږې، او نۀ به تهٔ د ورځې د غشى نه یریږې،

⁶او نۀ به د هغې وبا نه یریږې چې په تیارۀ کښې راځی، او نۀ به د هغې تباهئ نه چې په رڼا ورځ کښې راځی.

⁷زر کسان به دې په خوا کښې او لس زره به دې ښې لاس ته راوغورزیږی، خو تا ته به څۀ نقصان نهٔ رسیږی.

⁸کۀ تۀ صرف سترګې کولاو کړې، نو وبه ګورې چې بدعملو ته څنګه سزا ورکولے شی.

⁹کۀ چرے تهٔ قادر مطلق خُدائ خپل د پناه ځائ جوړکړې، او کۀ تهٔ مالِک خُدائ خپل د اوسيدو ځائ جوړ کړې.

¹⁰نو هيڅ قِسمه نقصان به تا ته ونهٔ رسیږی. او هیڅ قسمه آفت به ستا خیمې ته نهٔ رانزدې کیږی.

¹¹ځکه چې هغه به ستا په حقله خپلو فرښتو له حُکم ورکړی، تهٔ چې چرته هم ځې دوئ به ستا حفاظت وکړی.

¹²هغوئ به دې په خپلو لاسونو کښې پورته کړى چې هسې نه چې ستا ښپه په کاڼی ونهٔ دړدیږی.

¹³تۀ به په ازمرى او مار باندې خپې ږدې، تهٔ به ځوان زمرے او اژدها د خپو لاندې کړې.

¹⁴مالِک خُدائ وائی، ”ځکه چې دے ما سره مینه کوی زهٔ به یې بچ کړم، هغه زما په نامه یقین لری زهٔ به امان ورکړم.

¹⁵هغه به له ما نه سوال وکړی او زهٔ به هغه قبول کړم. په سخته کښې به زهٔ د هغهٔ سره یم زهٔ به هغه بچ کړم، او عزت به هغهٔ ته ورکړم.

¹⁶زهٔ به هغه په ډیر ژوند او عمر باندې موړ کړم، او زهٔ به خپل خلاصُون هغهٔ ته وښایم.“