Read Pashto (Nangahari) — د پښتو مقدس کتاب زبور 92 Bible Online

زبور 92 - Pashto (Nangahari) — د پښتو مقدس کتاب bible

زبور 92

¹دا ښۀ خبره ده چې ستا ثناء صِفت وکړُو مالِکه خُدایه، او په حمدونو کښې ستا د نوم ستائنه وکړُو خُدائ تعالىٰ.

²هر سحر چې ستا ابدی مینه یاده کړُو، او په شپه کښې ستا وفاداری یاده کړُو،

³د بينجو په لس تاريزه ساز کښې، او د رباب په سازونو کښې.

⁴ځکه چې تا زهٔ په خپلو کارونو خوشحاله کړے یم. ستا د لاسونو په کارونو زهٔ د خوشحالۍ سندرې وایم.

⁵اے مالِکه خُدايه، ستا کارونه څومره لوئ دی، او ستا سوچونه څومره ژور دی.

⁶بې احساسه خلق په دې نهٔ پوهیږی، او کم عقله په دې نهٔ پوهیږی.

⁷بدکاران کۀ څهٔ هم لکه د واښو هسې راټوکیږی، او ټول بدکاران کۀ اوچتیږی، خو بیا هم دوئ به د تل دپاره تباه کیږی.

⁸خو تهٔ، اے مالِکه خُدايه، اوچت يې تر ابده.

⁹په یقین سره ستا دشمنان به مالِکه خُدایه تباه شی، او ټول بدکاران به تالا والا شی،

¹⁰لکه د ځنګلی غوایې په شان تا زما ښکر اوچت کړے دے. په ښهٔ تیلو باندې دې غوړ کړے یم.

¹¹زما سترګو زما د دشمنانو شکست ولیدلو، زما غوږونو زما د بدکارو دشمنانو وريتې چغې واوريدلې.

¹²صادِقان به لکه د کجورې د ونې په شان ترقی کوی، او دوئ به لکه د لبنان د دیار غوندې لوئېږی.

¹³هغه چې د مالِک خُدائ په کور کښې کرلے شوی وی، دوئ به زمونږ د خُدائ پاک په دربار کښې غوړيږی.

¹⁴تر دې چې به په زوړ عمر کښې هم میوه نیسی، دوئ به هر وخت تازه او شنهٔ وی.

¹⁵نو داسې به دوئ دا ښکاره کړی چې مالِک خُدائ رښتينے دے، هغه زما د ‎پناه ګټ دے او په دهٔ کښې څهٔ بې اِنصافی نشته.