Read Pashto (Nangahari) — د پښتو مقدس کتاب زبور 94 Bible Online

زبور 94 - Pashto (Nangahari) — د پښتو مقدس کتاب bible

زبور 94

¹اے مالِکه خُدايه، بدله اخستُونکى، پاکه خُدايه، بدله اخستُونکى پاکه خُدايه خپل جلال دې وځلوه.

²اے د دنيا منصفه، راپاڅه، مغرورانو ته د دوئ د عملونو په مطابق سزا ورکړه.

³تر څو به بدکاران، مالِکه خُدایه، تر څو به بدکاران خوشحالی کوی؟

⁴هغوئ ټولې خبرې د کبر او د غرور کوی، ټول بدکاران ډیرې لافې کوی.

⁵اے مالِکه خُدايه، دوئ ستا خلق تباه کوی، هغوئ ستا په میراث باندې ظُلمونه کوی.

⁶هغوئ مسافر او کُنډې قتلوی، هغوئ یتیمان وژنی.

⁷دوئ وائى چې، ”مالِک خُدائ دا نهٔ ګوری، او د يعقوب خُدائ پاک پام نهٔ کوی.“

⁸اے د قوم بې عقله خلقو ځان خبر کړئ، اے ناپوهه خلقو تاسو به کله خپل ځان هوښیاروئ؟

⁹هغهٔ چې مونږ له يې غوږونه راکړل خپله اورېدے نۀ شى څۀ؟ هغهٔ چې مونږ له يې سترګې راکړې نو په خپله لیدلے نۀ شى څۀ؟

¹⁰څوک چې قومونه سموى نو سزا نۀ شى ورکولے څهٔ؟ څوک چې اِنسان ته پوهه ورکوى په خپله به ناپوهه وی څهٔ؟

¹¹مالِک خُدائ د اِنسان په سوچونو باندې پوهه دے، چې دا ټوله تشه هوا او بې فائدې دے.

¹²بختور دے هغه څوک چې تهٔ يې تنبیه کوې مالِکه خُدایه، بختور دے هغه چا ته چې تهٔ د خپل قانون نه سبق ورکوې،

¹³تهٔ هغهٔ ته په سختو ورځو کښې آرام ورکوې، تر څو چې بدعملو له کنده کنستلے شی.

¹⁴مالِک خُدائ به خپل خلق نۀ رد کوی، او هغه به خپل ميراث نۀ هیروی.

¹⁵یو ځل بیا به عدالت د صداقت په مطابق وشی، او ټول صادِقان به يې پیروی کوی.

¹⁶څوک به ما سره د بدکارانو په خلاف راپاڅیږی؟ او څوک به زما دپاره د بدعملو خلاف ودرېږى؟

¹⁷کۀ مالِک خُدائ زما مددګار نۀ وے، نو اوس به زۀ د مرګ په خاموشئ کښې اوسېدم.

¹⁸نوکله چې ما ووئيل چې، ”زما خپې ښوئيږی،“ نو ستا ابدى مينې زما مدد وکړو مالِکه خُدايه.

¹⁹کله چې زما د زړۀ بې قرارى ډېره زياته شوه، نو ستا تسلۍ زما روح ته خوشحالی راوړه.

²⁰بې اِنصافه مشران ستا سره ملګرتيا کولے شی، چې د قانون په نوم لا قانونیت جوړوی؟

²¹هغوئ د صادِقانو خلاف ډله جوړه وی، او بې ګناه خلق قاتل ګرځوی.

²²خو مالِک خُدائ زما پناه ګاه ده، او خُدائ پاک زما ګټ دے په چا کښې چې زۀ پناه اخلم.

²³هغه به دوئ ته د دوئ د ګناه په وجه سزا ورکړی. او د دوئ د شرارت په وجه به يې تباه کړی، مالِک خُدائ زمونږ خُدائ پاک به يې ختم کړی.