Read Pashto (Nangahari) — د پښتو مقدس کتاب زبور 96 Bible Online

زبور 96 - Pashto (Nangahari) — د پښتو مقدس کتاب bible

زبور 96

¹مالِک خُدائ ته يوه نوې سندره ووایئ، اے ټولې دنيا مالِک خُدائ ته سرود ووایئ.

²مالِک خُدائ ته سرود ووایئ او د هغهٔ د نوم ثناء ووایئ، او د هغهٔ خلاصُون هره ورځ بيان کړئ.

³په قومونو کښې د هغهٔ د جلال اعلان وکړه، د دنيا په ټولو خلقو کښې د هغهٔ د حیرانونکی کارونو غږ وکړئ.

⁴ځکه چې مالِک خُدائ لوئ دے او د ثناء صفت لایق دے، د ټولو معبودانو نه د هغهٔ زیاته یره په کار ده.

⁵ځکه چې د قومونو نور ټول معبودان تش بُتان دی، خو مالِک خُدائ آسمانونه جوړ کړی دی.

⁶شان او شوکت د هغهٔ سره ښائی، طاقت او جلال د هغۀ په مقدس کور کښې دے.

⁷اے د ټولو قومونو کورَنو، د مالِک خُدائ ثناء او صفت وکړئ، د مالِک خُدائ لوئې او طاقت بيان کړئ.

⁸د مالِک خُدائ هغه لوئې بيان کړئ کومه چې د هغهٔ نوم سره ښائی، د هغهٔ دربار ته راشئ او یوه نذرانه راوړئ.

⁹د مالِک خُدائ په خپل قدوسيت او شان شوکت کښې عبادت وکړئ، اے ټولې دنيا د هغهٔ د حضُور په وړاندې ولړزیږه.

¹⁰په ټولو قومونو کښې دا ووايئ چې، ”مالِک خُدائ بادشاهی کوی. د دنيا بنیادونه یې مضبوط کړی دی دا به نهٔ ښوزیږی. او په اِنصاف سره به د خلقو فېصلې وکړی.“

¹¹پرېږدئ چې آسمانونه خوشحاله شی او زمکه خوشحالی وکړی، سمندر او چې هغې کښې هر څۀ دى هغوئ دې خوشحالی وکړی.

¹²پټی دې هم خوشحالی وکړی او څهٔ چې په هغې کښې دی، نو د ځنګل ټولې ونې به د خوشحالۍ سندرې ووائی،

¹³دوئ به د مالِک خُدائ په وړاندې سندرې ووائی ځکه چې هغه راروان دے، هغه د دنيا د عدالت دپاره راځی، هغه به په صداقت سره د دنيا عدالت وکړی، او د خلقو عدالت به په خپل اِنصاف سره وکړی.