Read Pashto (Nangahari) — د پښتو مقدس کتاب متلونو 1 Bible Online

متلونو 1 - Pashto (Nangahari) — د پښتو مقدس کتاب bible

متلونو 1

¹د داؤد د زوئ د سليمان متلونه چې د بنى اسرائيلو بادشاه وو.

²د دوئ مقصد دا دے چې خلقو ته د حِکمت او تربيت په حقله تعليم ورکړى او چې هغوئ په عقلمندو خبرو باندې پوهه شى.

³دا به تاسو ته تعليم درکړى چې څنګه به خپل ژوند په صداقت، عدل او اِنصاف سره تيروئ.

⁴دا متلونه ساده خلق هوښياروى او ځوانانو له عقل او تميز ورکوى.

⁵دا متلونه د هوښيارانو پوهه نوره هم زياتوى او د عالِم راهنمائى کوى،

⁶نو هغوئ به په متلونو او مثالونو او د هوښيارانو په خبرو او د هغوئ په معماګانو دواړو باندې پوهه شى.

⁷د مالِک خُدائ يره د علم شروع ده، خو کم عقل خلق د حِکمت او تربيت سپکاوے کوى.

⁸زما زويه، د خپل پلار لارښونو ته غوږ شه او د خپلې مور تعليم دې مۀ هيروه.

⁹د هغوئ نصيحتُونه به ستا د سر دپاره ښائسته سهره او ستا غاړې دپاره د عزت هار وى.

¹⁰زما زويه، کله چې ګناهګاران ستا د بې لارې کولو کوشش کوى، نو د هغوئ نه ځان ساته.

¹¹کۀ چرې هغوئ ووائى، ”راځه، چې يو ځائ شو او د پټ ځائ نه ګذار وکړُو او قتل وکړُو! راځه چې په يو بې ګناه کس باندې هسې د خوند دپاره غلې حمله وکړُو!

¹²راځه چې د قبر په شان هغوئ ژوندى تير کړُو، د هغوئ په شان لکه څوک چې د مرګ کندې ته کوزيږى.

¹³مونږ به هر قِسمه قيمتى څيزُونه حاصل کړُو او د لوټ د مال نه به خپل کورونه ډک کړُو!

¹⁴راځه مونږ سره ملګرے شه او مونږ چې څۀ لوټ کړُو نو په هغې کښې به تا له هم برخه درکړُو.“

¹⁵زما زويه، د داسې خلقو سره مۀ ځه، او د هغوئ په نقش قدم مۀ ځه.

¹⁶ځکه چې هغوئ د بدکارئ طرف ته په منډه روان وى، او د وينې تويولو په اړخ تېزۍ سره روان وى.

¹⁷د يو مارغهٔ د سترګو د وړاندې جال خورول څومره بې فائدې دى.

¹⁸خو دغه شان خلق د خپل ځان دپاره دام خوروى، داسې دام چې هغوئ به په خپله په کښې تباه شى.

¹⁹هم دغه به وى انجام د هغه کسانو څوک چې د ناجائزه ‎پيسو ګټلو لالچى وى نو په دې وجه به د خپل ژوند نه لاس ووينځى.

²⁰حِکمت په لارو کُوڅو کښې په تېزه چغې وهى، او په چوکونو کښې په اوچت آواز نارې وهى.

²¹د بازار په ګڼه کښې هغه چغې وهى، او د ښار په دروازو کښې چرته چې خلق راغونډيږى هلته تقرير کوى:

²²”جاهله خلقو، تاسو به تر کومې پورې ساده ګان يئ؟ تر څو پورې به تاسو مسخره کوونکى په خپلو مسخرو کښې خوشحاله يئ؟ تر څو پورې به تاسو بې وقوفان عِلم نه نفرت کوئ؟

²³راشئ او زما سختې خبرې واورئ! زهٔ به خپل زړهٔ نه تاسو خبر کړم او تاسو به هوښيار کړم.

²⁴ما تاسو ته څو ځله آوازونه وکړل خو تاسو رانهٔ غلئ. زهٔ تاسو له درغلم خو تاسو ماته توجو رانهٔ کړه.

²⁵تاسو زما ټول نصيحتُونه نظر انداز کړل او زما اصلاح کول مو رد کړل.

²⁶خو چې کله تاسو په تکليف کښې پرېوزئ نو زۀ به په تاسو پورې ملنډې کوم. او زهٔ به تاسو پورې خندا کوم کله چې تاسو بدبختى راګير کړى.

²⁷کله چې بدبختى لکه د طوفان درباندې راشى، او چې مصيبت لکه د سيلۍ په شان درباندې راشى او چې مصيبت او سختى په تاسو باندې غالبه شى.

²⁸نو بيا چې کله دوئ ما ته چغې وهى، خو زۀ به دوئ ته جواب نهٔ ورکوم. دوئ به ما هر چرته د زړهٔ نه ولټوى، خو دوئ به ما پيدا نۀ کړى.

²⁹ځکه چې دوئ د پوهې نه نفرت کولو او دوئ د مالِک خُدائ نه نهٔ يريدل خوښ کړل.

³⁰دوئ زما نصيحت رد کړو، کله چې مې اصلاح کوله نو دوئ ماته هيڅ توجو رانهٔ کړه.

³¹نو په دې وجه دوئ به د خپل چال چلن ترخه ميوه وخورى او په خپلو منصُوبو به ماړهٔ شى.

³²د ساده خلقو سرکشى به دوئ مړهٔ کړى، کم عقلان د خپل قناعت په وجه تباه کيږى.

³³خو هر څوک چې ما ته غوږ نيسى نو هغه به په امن کښې اوسيږى، او د نقصان څۀ يره به پرې نۀ وى.“