Read Pashto (Nangahari) — د پښتو مقدس کتاب متلونو 14 Bible Online

متلونو 14 - Pashto (Nangahari) — د پښتو مقدس کتاب bible

متلونو 14

¹هوښياره ښځه خپل کور آبادوى، خو کم عقله ښځه يې په خپلو لاسونو ورانوى.

²څوک چې په نېغه لار ځى هغه د مالِک خُدائ نه يريږى، خو چې څوک په غلطه لار ځى هغه يې سپک ګڼى.

³د کم عقل د خبرو نه يو ډنډا جوړه شى چى هغه وهى، خو د هوښيارانو خبرې هغوئ بچ ساتى.

⁴چرته چى غوَيى نۀ وى هلته اخور خالى وى، خو د غوَيى د طاقت په وجه ډير فصل پيدا کيږى.

⁵يو رښتينے ګواه دروغ نۀ وائى، خو يو دروغژن ګواه ډوزې وولى.

⁶مسخره کوونکى حِکمت لټوى او هيڅ نۀ مومى، خو حِکمت آسانۍ سره تميز دارو له راځى.

⁷د کم عقلو نه لرې اوسه، ځکه چى تۀ به د هغهٔ د خُولې نه حِکمت حاصل نهٔ کړې.

⁸د هوښيار حِکمت دا دے چې خپلو لارو ته سوچ وکړى، خو د کم عقل کم عقلتوب هغه بې لارې کوى.

⁹کم عقل خپلې ګناه باندې خندا کوى، خو صادِقان د مالِک خُدائ رضا حاصلوى.

¹⁰هر څوک په خپل خفګان ښهٔ پوهيږى، او نور هيڅوک د هغهٔ په خوشحالۍ نهٔ پوهيږى.

¹¹د بدعمله کور به تباه شى، خو د صادِقانو خيمه به آباده شى.

¹²د هر کس په وړاندې يوه لار وى چې هغهٔ ته ښۀ ښکارى خو په آخر کښې د دې خاتمه مرګ وى.

¹³په خندا کښې هم زړهٔ خفه کيږى او خوشحالۍ نه وروستو هم خفګان پاتې شى.

¹⁴بې ايمانان چې د څهٔ حقدار وى هغه به ورته مِلاو شى او نېک انسان ته به د دهٔ د اعمالو په مطابق اجر مِلاو شى.

¹⁵يو ساده سړے په هر څهٔ باندې يقين کوى، خو هوښيار په هر قدم اوچتولو سوچ کوى.

¹⁶هوښيار احتياط کوى او د غلط کار نه ځان بچ ساتى، خو کم عقل په خپل ځان غاويره وى او د هيڅ پروا نهٔ کوى.

¹⁷تاوجن خلق کم عقل کارونه کوى، او د چالاکه انسان نه خلق نفرت کوى.

¹⁸ساده ګان په ميراث کښې کم عقلتوب پريږدى، خو هوښيارانو ته د علم تاج ور په سر وى.

¹⁹بدکاره انسانان به د نېکانو په حضور کښې، او شريران به د صادِقانو په دروازو کښې په ګوډو شى.

²⁰غريب د هيچا خوښ نۀ وى، تر دې چې خپل ګاونډيان يې هم نۀ خوښوى، خو مالداره ډير دوستان لرى.

²¹هغه څوک چې خپل ګاونډى سپک ګڼى ګناه کوى، خو بختور دے هغه څوک چې په غريب رحم کوى.

²²که څوک بدې ارادې لرى، هغه به ګمراه شى، که څوک نيکې ارادې لرى، هغه به مينه او وفا ومومى.

²³ټول سخت کارونه فائده ورکوى، خو د تشو خبرو په وجه غربت راځى.

²⁴د هوښيارانو مال دولت د دوئ تاج دے، خو د ناپوهه هار صرف کم عقلتوب دے.

²⁵يو رښتونے ګواه ژوند بچ کوى، خو دروغژن ګواه دوکه مار وى.

²⁶هغه څوک چې د مالِک خُدائ نه يره کوى هغه به د هغهٔ محفوظه قلعه وى، او د هغهٔ ماشومانو ته به دا پناه ګاه وى.

²⁷د مالِک خُدائ يره د ژوندون سر چينه ده، کوم چې انسان د مرګ د دامونو نه ساتى.

²⁸په ګڼو خلقو د بادشاه عزت جوړ وى، او د خلقو نشتوالے د شهزاده تباهى ده.

²⁹صبرناک سړے لويه پوهه لرى، خو غصه ناک سړے خپل کم عقلتوب په ګوته کوى.

³⁰پرسکونه زړهٔ بدن ته ژوندون ورکوى، خو حسد هډُوکى بوسه کوى.

³¹څوک چې په غريبانانو ظلم کوى نو دا د هغوئ د خالِق بې‌عزتى کوى، خو څوک چې په ضرورت مند رحم کوى د خُدائ پاک احترام کوى.

³²بدکاران په خپلو بدو عملونو سره خپل ځان تباه کوى، خو تر دې چې صادِقان په مرګ کښې هم پناه ګاه لرى.

³³د هوښيارانو په زړهٔ کښې حِکمت ځائ نيسى، خو تر دې چې حِکمت په کم عقلو کښې هم خپل ځان ښکاره کوى.

³⁴صداقت سره قوم عظيم شى او ګناه د هر چا دپاره رسوائې ده.

³⁵بادشاه په هوښيار نوکر خوشحاليږى، خو هغه څوک چې شرميدلى کارونه کوى د هغهٔ قهر راوچتوى.